პარტია ერთიანი საქართველო — დემოკრატიული მოძრაობის წევრი, ანზორ ბიწაძე აცხადებს, რომ ალეკო ელისაშვილს ოპოზიციის ოპოზიციონერობა უნდა, რაც მომავალ არჩევნებზე ბიძინა ივანიშვილის "თამაში" იქნება. ამ თემაზე მან TV პირველის ეთერში ისაუბრა.

"ეს არის ალეკოს არჩევანი, როგორც ჩანს მან გადაწყვიტა, რომ ოპოზიციის ოპოზიცია იყოს, იმიტომ, რომ ის განცხადებები რაც მოვისმინე, ეს არის მხოლოდ და მხოლოდ ოპოზიციის ოპოზიციონერობა და მეტი არაფერი. ამ არჩევნებზე ოპოზიციის ოპოზიციონერობა საქართველოში იქნება ბიძინა ივანიშვილის თამაში", — თქვა ანზორ ბიწაძემ.

ბიწაძემ აღნიშნა, რომ ისინი მოახდენენ ლუსტრაციას მათი ნაბიჯებიდან გამომდინარე, რომ არავის ჰქონდეს "ცდუნება" იყოს ოპოზიციის ოპოზიცია.

იუსტიციის უმაღლესი საბჭოს არამოსამართლე წევრმა, ანა დოლიძემ, პარლამენტის დამოუკიდებელმა დეპუტატმა ლევან კობერიძემ და სამოქალაქო მოძრაობის ლიდერებმა ალეკო ელისაშვილმა და ლევან იოსელიანმა ერთობლივი პოლიტიკური პლატფორმა შექმნეს. ახალი პოლიტიკური პლატფორმის შექმნასთან დაკავშირებით მათ მემორანდუმს ხელი დღეს, 18 ივნისს მოაწერეს. ისინი საერთო პარტიის ჩამოყალიბებას გეგმავენ.

ალეკო ელისაშვილმა აღნიშნა, რომ მისთვის ლეიბორისტულ პარტიის ოფისში გაერთიანებულ ოპოზიციასთან ერთად ყოფნა დისკომფორტს ქმნიდა, რადგან ბევრი მიუღებელი ადამიანი ესწრებოდა.