უმრავლესობის წევრი, დავით მათიკაშვილი ამბობს, რომ თუ არჩევნები გადაიდება, ეს საზოგადოების გამოწვევებიდან იქნება ნაკარნახევი. მისი თქმით, ოპოზიციის განცხადებები არჩევნების შესაძლო გადადებასთან დაკავშირებით, სპეკულაციაა.

"ყველა გადაწყვეტილება, ამას მინდა ხაზი გავუსვა, რაც იქნება არჩევნებთან დაკავშირებით მიღებული, იქნება იმ გამოწვევებით ნაკარნახევი, რომელიც კონკრეტულად მოცემულ სიტუაციაში იქნება საზოგადოებაში. ასე, რომ არჩევნების საკითხი არანაირად არ ექვემდებარება გადახედვას. თუმცა პანდემიის და საგანგებო ვითარების მდგომარეობაში კონსტიტუცია განსაზღვრავს, როგორ და რა წესით ტარდება არჩევნები", — განაცხადა მათიკაშვილმა.

ქართული ოცნების აღმასრულებელმა მდივანმა, ირაკლი კობახიძემ თქვა, რომ თუ COVID-19-ის მე-2 ტალღა ოქტომბრამდე იქნება, არჩევნები დეკემბრისთვის გადაიწევს. კობახიძე ვარაუდობს, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდეა], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს. კანონით კი, არჩევნები საგანგებო მდგომარეობის გაუქმებიდან არაუადრეს 45 დღისა და არაუგვიანეს 60 დღისა უნდა ჩატარდეს.

ნაციონალური მოძრაობის წევრის, სალომე სამადაშვილის თქმით, ხელისუფლებას მოახლოებული არჩევნების უკიდურესად ეშინია და არჩევნების შესაძლო გადადებაზე საუბარი ამიტომ დაიწყო.