თბილისის მერის კახა კალაძის განცხადებით, თბილისის ავტობუსებების 15 ხაზზე მგზავრთა გადაჭარბებული რაოდენობა შეიმჩნევა. მისივე თქმით, თბილისის მერია ამ საკითხზე უკვე მუშაობს. როგორც კალაძე ამბობს, გადაწყვეტილება ორშაბათს, 15 ივნისს გახდება ცნობილი.

"როცა საზოგადოებრივი ტრანსპორტით გადაადგილები, სასიამოვნო არ არის პირბადით გადაადგილება, მაგრამ ეს აუცილებელია იმისათვის, რომ ყველა ადამიანმა, ვინც სარგებლობს საზოგადოებრივი ტრანსპორტით, პირველ რიგში საკუთარი ჯანმრთელობა დაიცვას", — განაცხადა თბილისის მერმა.

საზოგადოებრივ ტრანსპორტში პირბადის ტარება აუცილებელია. ამასთან, 12 ივნისს საქართველოს პარლამენტმა დაამტკიცა კანონპროექტი, რომელიც დახურულ საჯარო სივრცეში თავშეყრისას, პირბადის ტარების წესის დარღვევისთვის ჯარიმას ითვალისწინებს.

იმ შემთხვევაში, თუ მოქალაქე ამ წესს დაარღვევს, 20 ლარით დაჯარიმდება, ხოლო იურიდიული პირი — 500 ლარით. ამასთან, პირბადის ტარება სავალდებულოა საზოგადოებრივი ტრანსპორტით გადაადგილების დროსაც.

როგორც პარლამენტში იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა, პირბადეების ტარების შესახებ კანონს გამოიყენებენ მხოლოდ მას შემდგომ, როდესაც მთავრობა პირბადის ტარებასთან დაკავშირებით წესს გაწერს.