ქართული ოცნების დეპუტატი, ზაზა პაპუაშვილი ეხმაურება ირაკლი ღარიბაშვილის რეპლიკას, სადაც თავდაცვის მინისტრი ამბობს, რომ "დესტრუქციული ძალები" და "ფსევდოდასავლური ორგანიზაციები" ეკლესიას და ხელისუფლებას ებრძვიან. დეპუტატის თქმით, "დესტრუქციული ძალებისთვის" მათ "ადრე უნდა მიეჩინათ ადგილი".

დეპუტატს არ დაუკონკრეტებია, რას გულისხმობს "ადგილის მიჩენაში".

"გასაგებია ის შემოტევები, რაც არსებობს ჩვენს ქვეყანაში ნებისმიერი კარგი, კეთილი წამოწყების მიმართ. ეს ეკლესია იქნება, მეცნიერები იქნებიან, ექიმები იქნებიან... ჯარში შემოსილობაზე, ეკიპირებაზე ვლაპარაკობ და დესტრუქციულ ძალებზე, რომლებზეც თქვენ ლაპარაკობთ. მაგრამ ამ დესტრუქციული ძალებისთვის ჩვენ რომ ადრე მიგვეჩინა ადგილი, კარგი იქნებოდა. დღეს არ გვექნებოდა სურვილი, რომ გვეძახა მათთვის პარტნიორები თუ ოპონენტები. ამას ყოველთვის წამოგვაძახებენ ჩვენი ამომრჩევლები და ამაში ყოველთვის მართლები იქნებიან", — თქვა პაპუაშვილმა ირაკლი ღარიბაშვილისთვის კითხვის დასმის დროს.

თავდაცვის მინისტრი დღეს პარლამენტში მინისტრის საათის ფარგლებში იმყოფება. სიტყვით გამოსვლის დროს მან თქვა, რომ საქართველოს წინაშე არსებული გარე საფრთხეების გარდა, "ძლიერდება შიდა რყევები", რის მიზეზადაც ის "დესტრუქციული ძალების გააქტიურებას" ასახელებს. ღარიბაშვილის აზრით, მათი მიზანი "მაღალი რეიტინგის მქონე ხელისუფლებისა და ავტორიტეტული ინსტიტუციების დასუსტებაა".