ევროპული საქართველოს ერთ-ერთი ლიდერის, გიგი უგულავას განცხადებით "ბრიყვ" ღარიბაშვილის არ ესმის, რომ პარლამენტარიზმის ანა-ბანა ნიშნავს პარლამენტში ყველა შეკითხვის მოსმენას. ამ თემაზე კომენტარი მან TV პირველის ეთერში გააკეთა.

"ქართულ ოცნებას ბევრი გამორჩეული ბრიყვი ჰყავს, მაგრამ მათ შორის ყველაზე წარჩინებული და ჩინებული მაინც ღარიბაშვილია. ის ამ სიმაღლეებს ყოველდღიურად იპყრობს. სამწუხაროა, რომ მინისტრის რანგში ადამიანი იმყოფება, რომელსაც ანაბანა არ ესმის დემოკრატიის და ანგარიშვალდებულების. [...] პარლამენტარიზმის ანა-ბანა ნიშნავს, ამ ბრიყვი მინისტრის გასაგონად მინდა ვთქვა, რომ მან პარლამენტში უნდა მოუსმინოს ყველა შეკითხვას, რადგან პარლამენტი შენი ქვეყნის წარმომადგენლობითი ორგანოა", — თქვა გიგი უგულავამ.

თავდაცვის მინისტრი, ირაკლი ღარიბაშვილი პარლამენტში დღეს, 12 მაისს მინისტრის საათის ფარგლებშია მისული. მან თქვა, რომ ოპოზიციის შეკითხვებს არ უპასუხებს, რადგან მათ პოლიტიკოსებად არ აღიქვამს.

"ისინი არიან დამნაშავეები, ეს არის ჩემი პოზიცია და მე ამაში ღრმად ვარ დარწმუნებული. მე ამ ადამიანების მიმართ არავითარი პოლიტიკური სიმპათია და ვალდებულება არ მაქვს, რომ მათ პასუხი გავცე ნებისმიერ კითხვაზე", — განაცხადა ღარიბაშვილმა პალიტრანიუსის ეთერში.

ირაკლი ღარიბაშვილი თავდაცვის მინისტრის რანგში პარლამენტში პირველად წარდგება.