საკულტო შოუს Friends-ის ერთ-ერთი შემქმნელი მართა კაუფმანი ამბობს, რომ რასობრივი თანასწორობისა და მრავალფეროვნების საჩვენებლად თავის სერიალებში "საკმარისი არ გაუკეთებია".

კაუფმანი მეგობრების გარდა, Grace and Frankie-ის თანაავტორიცაა. როცა ონლაინ დისკუსიისას მას ჰკითხეს, იყო თუ არა რამე ისეთი, რის ცოდნასაც კარიერის დასაწყისში ისურვებდა, კაუფმანმა უპასუხა:

"ვისურვებდი მცოდნოდა ის ყველაფერი, რაც ახლა ვიცი. ამ შემთხვევაში ძალიან განსხვავებულ გადაწყვეტილებებს მივიღებდი. ჩვენს კომპანიაში მრავალფეროვნება მუდამ წახალისებული იყო, მაგრამ ჩემს შოუებში საკმარისი არ გამიკეთებია. ახლა რას გავაკეთებდი განსხვავებულად? ამაზე ბევრს ვფიქრობ".

მიუხედავად მეგობრების საყოველთაო წარმატებისა, ბოლო წლებში სერიალს მრავალფეროვნების ნაკლებობის გამო აკრიტიკებენ, მათ შორის მთავარი გმირების შემსრულებელი მსახიობებიც.

2020 წლის დასაწყისში როს გელერის როლის შემსრულებელმა, დევიდ შვიმერმა თქვა, რომ შოუში მუდამ ცდილობდა რასობრივი მრავალფეროვნების შეტანას და დასძინა, რომ თავად ითხოვდა, რომ თუნდაც იმ გოგოების როლები შეესრულებინათ სხვა რასის წარმომადგენლებს, რომლებსაც მისი პერსონაჟი ხვდებოდა:

"შოუში ჩემი ერთ-ერთი პირველი შეყვარებული აზიელი ამერიკელი ქალი იყო, მოგვიანებით კი როსი აფრო-ამერიკელ ქალს ხვდებოდა. ამ ნაწილში ჩემი ჩართულობა მაღალი იყო".

ფოტო: NBC

ფოტო: NBC

როცა ცოტა ხნის წინ ფიბის როლის შემსრულებელ ლიზა კუდროუს ჰკითხეს, როგორი იქნებოდა მის წარმოდგენაში მეგობრების თანამედროვე რიბუთი, მსახიობმა უპასუხა:

"პირველ რიგში, ყველასთვის საყვარელი ექვსეული თეთრკანიანი ნამდვილად არ იქნებოდა". კუდროუმ დასძინა, რომ შოუში რასობრივი მრავალფეროვნების ნაკლებობა იმ ეპოქასთან იყო დაკავშირებული, როცა ის გადაიღეს.

მეგობრების 10 სეზონი 1994-2004 წლებში გადიოდა ამერიკულ ტელეარხ NBC-ზე და ის ტელევიზიის ისტორიაში დღემდე ერთ-ერთ ყველაზე პოპულარულ და წარმატებულ სიტკომად ითვლება.