მთავრობის ადმინისტრაციის ცნობით, 2020 წლის ბოლომდე ხაშურის 13 კმ-იანი ოთხზოლიანი მაგისტრალური შემოვლითი გზის მშენებლობა დასრულდება. უწყება აცხადებს, რომ გზის სამშენებლო სამუშაოები საგანგებო მდგომარეობის პირობებშიც არ შეჩერებულა.

პრემიერ გიორგი გახარიას თქმით, აღნიშნული მონაკვეთი, ქვეყნის მთავარი სატრანზიტო ავტომაგისტრალის შემადგენელი ნაწილია და მისი ექსპლუატაციაში შესვლით ჩქაროსნული გზის გამტარუნარიანობა მნიშვნელოვნად გაიზრდება. პროექტის დასრულების შედეგად, ასევე გაიზრდება ავტოტრანსპორტის მოძრაობის უსაფრთხოების დონე და შემცირდება მგზავრობის დრო, გადაზიდვების ხარჯები.

რეგიონული განვითარებისა და ინფრასტრუქტურის სამინისტრის ცნობით, ამ დროისთვის, სამუშაოები 1,9 კმ-იან მონაკვეთზე მიმდინარეობს, სადაც ასევე 420-მეტრიანი ხიდი შენდება.

ზემო ოსიაური–ჩუმათელეთის გზის მეორე მონაკვეთის დარჩენილი 6,4 კმ-იანი გზის მშენებლობისთვის, ამ ეტაპზე მიმდინარეობს სატენდერო წინადადებების შერჩევა-შეფასება. პროექტის ფარგლებში, საერთო ჯამში აშენდება 4-ზოლიანი ცემენტ-ბეტონის გზა, 21 ხიდი, 5 გვირაბი, რკინა-ბეტონის მიწისქვეშა გასასვლელები, მოეწყობა წყალგამტარი მილები და სადრენაჟე სისტემები.