ევროპული საქართველოს ერთ-ერთი ლიდერის, სერგი კაპანაძის თქმით, კობახიძის შეფასება ამჯერადაც "აცდა" და 20 ივნისის აქციაზე "200 ნაციონალზე" მეტი შეიკრიბება. ამ თემასთან დაკავშირებით, მან კომენტარი მთავარ არხთან ისაუბრა. მანამდე ირაკლი კობახიძემ მედიასთან საუბრისას თქვა, რომ აქციაზე 200 ნაციონალი შეიკრიბება, რომელთა თავებიც ყველას შეუძლია დათვალოს.

"რაც შეეხება კობახიძის განცხადებას, აქციაზე 200 მეტი ადამიანი იქნება და არც მარტო ნაციონალები იქნებიან. ზოგადად ერთხელ მაინც ხომ შეიძლება, რომ რამეს გაარტყას კობახიძემ, აი სულ ესე აცილებს ხოლმე როცა რაღაც შეფასებას აკეთებს", — თქვა სერგი კაპანაძემ.

დეპუტატმა ირაკლი კობახიძემ ფორმულასთან საუბრისას აღნიშნა, რომ კანონი პოლიტიკურ შეკრებებს არ კრძალავს და დისტანციის დაცვის გათვალისწინებით 20 ივნისს შეკრებილი 200 ნაციონალის დათვლა უფრო მარტივი იქნება.

მოძრაობა სირცხვილია 20 ივნისიდან 1 წლის თავზე რუსთაველზე აქციის გამართვას გეგმავს. ორგანიზატორების განცხადებით, აქცია წესებისა და რეკომენდაციების დაცვით გაიმართება.

მათი თქმით, ხელისუფლების ქმედებები 1 წლის თავზეც სირცხვილია. მათივე განცხადებით, ხელისუფლებამ საკუთარ შეცდომაზე სწავლის ნაცვლად, გამოცხადებული ომი კიდევ უფრო გაამწვავა და თავისუფალ აზრს დაუპირისპირა როგორც ადმინისტრაციული რესურსი, ასევე მის მიერ მართული მედია და ასეულობით ყალბი ანგარიში სოციალურ ქსელში.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.