დაავადებათა კონტროლის ცენტრის სამეცნიერო ხელმძღვანელის, პაატა იმნაძის თქმით, ღია აუზებზე შესვლა, სადაც ხალხი ქუჩიდან ხვდება, უნდა დარეგულირდეს. როგორც იმნაძემ აღნიშნა, აუზები გაიხსნება, თუმცა გახსნის დრო არ დაუკონკრეტებია.

რაც შეეხება სასტუმროების აუზებს, მისი განმარტებით, აქ აუზით სარგებლობა მხოლოდ სასტუმროს დამსვენებლისთვისაა ნებადართული.

"სასტუმროებში არის ფიქსირებული, მხოლოდ სტუმრებისთვის არის ნებადართული და არა გარედან შესული ადამიანებისათვის. ყველაფერი ერთად ვერ გაიხსნება, მოდით ამაზე შევთანხმდეთ. უნდა იყოს რაღაცა რიგითობა დაცული, ქვეყანაში დაჩქარებული წესით მოხდა ბიზნესსექტორის სხვადასხვა აქტივობების გახსნა. რა თქმა უნდა გაიხსნება ის აუზებიც, მაგრამ იქაც იქნება გარკვეული განსხვავებული წესები შესამუშავებელი, იმიტომ, რომ სასტუმროში არიან ფიქსირებული ადამიანები, ვინც არიან ამ სასტუმროს დამსვენებლები. ღია აუზებზე ადამიანები ქუჩიდანაც შედიან და ეს არის დასარეგულირებელი. რა თქმა უნდა ყველაფერი გაიხსნება, ოღონდ თავის დროზე", — განაცხადა იმნაძემ.