ამერიკის შეერთებული შტატების საელჩო თბილისში, ჯორჯ ფოლოიდის სიკვდილსა და მიმდინარე საპროტესტო აქციებს ეხმაურება. სალეჩო აღნიშნავს, რომ აშშ არ ეცდება დაფაროს "მტკივნეული ბრძოლა", რადგან გულწრფელი საჯარო დისკუსია ქვეყანას ეხმარება უკეთესი გახდეს.

საელჩო განცხადებაში ნათქვამია, რომ ამერიკა არის ქვეყანა, რომელიც დიდი ხანია ისწრაფვის დემოკრატიული ღირებულებების განსამტკიცებლად, რაც მოიცავს კანონის უზენაესობას, სამართლიან და თანასწორ მოპყრობას ყველას მიმართ, როგორც ქვეყნის შიგნით, ასევე მის საზღვრებს გარეთ. საელჩო წერს, რომ მათი ძალისხმევა ამ მიმართულებით, შორსაა სრულყოფისგან.

"ჩვენი ფუნდამენტური ღირებულებები: სიტყვის, პრესისა და მშვიდობიანი შეკრების თავისუფლება აქცევს ამერიკას ღია ქვეყნად, რომელიც ესწრაფვის თავისუფლებასა და სამართლიანობას ყველასათვის და უარყოფს ძალადობას, რომელიც არავის და არანაირ ღირებულ მიზანს არ ემსახურება. ჩვენ ვისწრაფვით ამ იდეალების გათავისებისკენ, როგორც ჩვენს ქვეყანაში, ასევე საქართველოსა და მთელ მსოფლიოში, რადგანაც ეს იდეალები ძლიერი დემოკრატიის განუყოფელი ნაწილია. ჩვენ არ შევეცდებით დავფაროთ ჩვენი მტკივნეული ბრძოლა, რადგან გვჯერა, რომ გულწრფელი საჯარო დისკუსია დაგვეხმარება გავხდეთ უკეთესი და უფრო ძლიერი. ფუნდამენტური ღირებულებების განმტკიცება არის გზა, რომლის საშუალებითაც სრულად მივაღწევთ თანასწორობას და შევებრძოლებით დისკრიმინაციასა და უსამართლობას. ჩვენ გვამხნევებს საქართველოსა და მთელ მსოფლიოში, ჩვენი პარტნიორების მხრიდან გამოთქმული წუხილი და მხარდაჭერა", — წერია საელჩოს განცხადებაში.

აქციები ამერიკაში და სხვა ქვეყნებში მინეაპოლისში პოლიციელის მხრიდან დაკავებისას ძალის გამოყენების დროს აფრო-ამერიკელი ჯორჯ ფლოიდის გარდაცვალებას მოჰყვა. გავრცელებულ ვიდეოებში ჩანს, რომ პოლიციელი დერეკ შოვინი 8 წუთის განმავლობაში ფლოიდს კისერზე ფეხს აჭერდა, დაკავებული ამბობდა, რომ ვერ სუნთქავდა. ექსპერტიზამ დაადასტურა, რომ ჯორჯ ფლოიდის გარდაცვალების მიზეზი ჟანგბადის ნაკლებობა გახდა.

აღნიშნული შემთხვევიდან მალევე დერეკ შოვინი და კიდევ სამი პოლიციელი სამსახურიდან გაათავისუფლეს. რამდენიმე დღეში კი შოვინი ფლოიდის მკვლელობის ბრალდებით დააკავეს.

მიუხედავად იმისა, რომ ამერიკის 40 ქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ. ნიუ-იორკში, ჩოკაგოში, ფილადელფიასა და ლოს-ანჯელესში აქციის მონაწილეების წინააღმდეგ პოლიციამ ცრემლსადენი გაზი და წიწაკის ტყვიები გამოიყენა. რამდენიმე ქალაქში აქციის მონაწილეებმა პოლიციის მანქანები და მაღაზიები გადაწვეს.