ევროპული საქართველოს ერთ-ერთი ლიდერის, გიგა ბოკერიას განცხადებით, ერთიანი ნაციონალური მოძრაობის წევრის, ნიკა მელიას ბრიფინგი კარგი ნაბიჯი იყო, თუმცა ოლქების დასახელებას არაკორექტული დეტალი უწოდა.

4 ივნისს ნიკა მელიამ განაცხადა, რომ მისი პარტია მზადაა, თბილისში 8 მაჟორიტარული ოლქიდან 6 ოპოზიციის კანდიდატებს დაუთმოს. მისივე თქმით, პარტია წინასაარჩევნო კამპანიას თბილისის მხოლოდ ორ რაიონში — გლდანსა და სამგორში დაიწყებს.

როგორც ბოკერია ამბობს, მელიას მხრიდან ოლქების დასახელება ნორმალური არ იყო. მისივე თქმით, ახლა მთავარია ამ შეთავაზების შესრულება და სხვა პოლიტიკური პარტიები შეთანხმდებიან გვარებზე.

"ჩვენ ვიყავით საფრთხის ქვეშ იმ რიტორიკის ფონზე, რაც მოვისმინეთ" ნაციონალური მოძრაობის" წარმომადგენლებისგან, რომ საერთოდ ეჭვის ქვეშ დგებოდა საჭიროება პირველ ტურებში შეთანხმების. მე არ მიყვარს სპეკულაცია, მე ვუსმენდი საჯარო განცხადებებს და ამ საჯარო განცხადებებმა არა მარტო ჩვენი, ლეიბორისტების, გირჩის, ყველას შეშფოთება გამოიწვია. შეშფოთება გამოწვია ამან, მაგრამ კარგია, რაც კარგად მთავრდება. ბატონ მელიას გუშინდელი ბრიფინგი ამ ერთი არაკორექტული დეტალის მიღმა, ვგულისხმობ ოლქების დასახლებას, საერთო ჯამში იმ ამოცანისთვის, რომლებიც ქვეყნის წინაშე დგას, არა პოლიტიკური პარტიების, არამედ ქვეყნის, არის კარგი ნაბიჯი", — განაცხადა ბოკერიამ.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: