კორონავირუსის გამო დაწესებული შეზღუდვების მიუხედავად, ჰონგ-კონგში ტიანანმენის მოედანზე დაღუპულთა ხსოვნის პატივსაცემად ათასობით ადამიანი შეიკრიბა. 4 ივნისს ტიანანმენის მოედანზე ჩინეთის სამთავრობო ძალების მიერ მომიტინგეების დახოცვიდან 31 წელი გავიდა.

მიუხედავად იმისა, რომ ჩინეთი ტიანანმენის მოედანზე მომხდარი მოვლენების ისტორიიდან წაშლას ცდილობს და პარალელურად კორონავირუსის გამო 8-ზე მეტი ადამიანის შეკრება აკრძალულია, ჰონგ-კონგის ერთ-ერთ პარკში, რომელიც პოლიციელების მიერ ბარიკადებით იყო გარშემორტყმული, ათასობით მოქალაქემ დისტანციის დაცვით მაინც სცადა თავიანთი პოზიციის დაფიქსირება. მათ სანთლები აანთეს, შეკრებილ შორის ისმოდა, როგორც დემოკრატიული, ისე ჩინეთისგან დამოუკიდებლობის მოთხოვნის რადიკალური ლოზუნგები.

მათ, ვინც პარკში მისვლა ვერ შეძლეს, თავიანთი პატივისცემის ნიშნად, სანთლები იმ ადგილებში აანთეს, სადაც იმ მომენტისთვის იმყოფებოდნენ.

როგორც აქციის ერთ-ერთმა მონაწილემ Washington Post-ს უთხრა, თავადაც იმისთვის იბრძვიან, რისთვისაც 31 წლის წინ ტიანანმენის მოედანზე შეკრებილები იბრძოდნენ.

"ჩინეთის კომუნისტური პარტია არ შეცვლილა, ჩაგვრა, ჩახშობა და დევნა მხოლოდ გაიზარდა. არ უნდა დაგვავიწყდეს და არც შეგვიძლია შეწყვიტოთ ბრძოლა", — განაცხადა მან.

ტიანანმენის მოედანი პეკინის ცენტრში მდებარეობს. 1989 წელს, რამდენიმეკვირიანი დემონსტრაციების შემდეგ, ჩინეთის ჯარებმა 4 ივნისს ტიანანმენის მოედანზე შეკრებილი მშვიდობიანი მოქალაქეებს ცეცხლი გაუხსნეს. დაღუპულთა ზუსტი რიცხვი უცნობია.
ცნობილია, რომ დაახლოებით 10 000 ადამიანი დააპატიმრეს, მათი ნაწილი სიკვდილით დასაჯეს.