გაერთიანებული ოპოზიცია ძალა ერთობაშიას ერთ-ერთი ლიდერი, გიორგი ვაშაძე განმარტავს, რომ მას პრემიერ-მინისტრის კანდიდატად საკუთარი თავი არ დაუყენებია, არამედ, ეს იყო კონკრეტული პირების მოსაზრებები. ამის შესახებ ვაშაძემ დღეს, 2 ივნისს ბრიფინგზე ისაუბრა:

"გუშინ ძალიან გამიკვირდა ეს რადიკალური განცხადებები. მე ჩემი კანდიდატურა არ დამიყენებია ჯერ გაერთიანებული ოპოზიციის ფორმატში პრემიერობაზე, ეს იყო ადამიანების გარკვეული მოსაზრებები. ყველას მინდა ვუთხრა და დავამშვიდო, რომ ასეთი განცხადებებით დისონანსს ვერ შიტანთ ჩვენს ერთიანობაში. [...] ვფიქრობ, რომ ძალა ერთობაშიას, პოლიტიკურ ბლოკს აუცილებლად უნდა ჰყავდეს პრემიერობის კანდიდატიც და აუცილებლად უნდა დაასახელოს გუნდიც. ხალხი ხმას აძლევს კონკრეტულ დაპირებებზე პასუხისმგებელ ადამიანებს. [...] ამ გაერთიანების ჩამოყალიბების დღიდან ჩვენ გეგმაზომიერად და სტრატეგიულად ვმუშაობთ. ნუ შევიტანთ დისონანსს გაერთიანებაში, ნუ გავაკეთებთ იმ საქმეს, რომელიც ჩვენს ოპონენტებს, ჩვენს მტერს უნდა".

გიორგი ვაშაძის პრემიერობის კანდიდატად დაყენებაზე გუშინ თაკო ჩარკვიანმა გააჟღერა ინფორმაცია, თუმცა მოგვიანებით, ის ნაციონალური მოძრაობის ლიდერმა, ზაალ უდუმაშვილმა უარყო.

"ერთიანი ნაციონალური მოძრაობის სახელით შემიძლია გითხრათ, რომ პრემიერ- მინისტრობის კანდიდატად გიორგი ვაშაძე არ ყოფილა განხილული არც წარსულში, არც დღევანდელ შეხვედრაზე და არც მომავალში განიხილება", — თქვა უდუმაშვილმა და დაამატა, რომ კონკრეტული გვარები და სახელები შეხვედრაზე არ განხილულა.