თანამედროვე მსოფლიო ლიტერატურაში ერთ-ერთი ყველაზე გამორჩეული პიროვნული თვისებებისა და საინტერესო სიუჟეტური ხაზის მქონე პერსონაჟის, ლიზბეთ სალანდერის შესახებ ახალ სერიალს იღებენ.

Amazon გეგმავს, რომ შვედი მწერლის, სტიგ ლარსონის მილენიუმის ტრილოგიით ცნობილი წიგნების სერიის მიხედვით, რომელიც სამ წიგნს — გოგონა დრაკონის ტატუთი, გოგონა, რომელიც ცეცხლს ეთამაშებოდა და გოგონა, რომელმაც კრაზანების ბუდე დაანგრია — აერთიანებს, ახალი სატელევიზიო შოუ შექმნას.

სტიგ ლარსონის ამ ცნობილი წიგნების ას მილიონზე მეტი ეგზემპლარია მთელ მსოფლიოში გაყიდული, თუმცა ახალი სერიალი მათი პირდაპირი ეკრანიზაცია არ იქნება: შოუს შემქმნელები დამოუკიდებელ სერიალს გადაიღებენ მთავარი პერსონაჟის, ლიზბეთ სალანდერის შესახებ და მის ისტორიას თანამედროვე დროში განავითარებენ.

ჯერჯერობით უცნობია, თუ ვინ შეასრულებს მთავარ როლს, რაც განსაკუთრებით მნიშვნელოვანია, რადგან მაყურებლებს უკვე სამი სხვადასხვა ეკრანიზაცია და სალანდერის როლზე სამი სხვადასხვა მსახიობის შესრულება უნახავთ: 2009 წელს შვედური ეკრანიზაცია გამოვიდა, რომელშიც მთავარ როლს ნუმი რაპასი ასრულებს; 2011 წელს დევიდ ფინჩერმა გადაიღო ტრილოგიის პირველი წიგნის მიხედვით ფილმი რუნი მარას მონაწილეობით; 2011 წელს კი ეკრანებზე ფედერიკო ალვარესის The Girl in the Spider's Web გამოვიდა, რომელშიც კლერ ფოი თამაშობს.

რუნი მარა და დენიელ კრეიგი დევიდ ფინჩერის ფილმში The Girl with the Dragon Tattoo (2011)

ფოტო: SONY

მომავალი სერიალის აღმასრულებელი პროდიუსერი ენდი ჰარიესი იქნება, რომელსაც აქამდე ისეთი ცნობილი სერიალების შექმნაში მიუღია მონაწილეობა, როგორებიცაა The Queen, The Crown და Outlander.