მთავრობის ადმინისტრაციის ხელმძღვანელის, ნათია მეზვრიშვილის განცხადებით, გარკვეულ ეტაპზე ტანსაცმლისა და ფეხსაცმლის მაღაზიები გაიხსნება. როგორც მან რუსთავი 2-ის ეთერში განაცხადა, ტანსაცმელი და ფეხსაცმელი პირველადი მოხმარების პროდუქცია არაა.

"ტანსაცმლისა და ფეხსაცმლის მაღაზიებმა არაფერი დააშავა იმის გარდა, რომ ფიზიკურ შეხებასთან არის ეს ყველაფერი დაკავშირებული, შედარებით უფრო მეტი რისკის შემცველია, ვიდრე სხვა პროდუქტების რეალიზაცია, სხვა ეკონომიკური საქმიანობები. გარდა ამისა, სხვა საქმიანობებისა და რეალიზაციისგან განსხვებით, მინდა მაყურებელმა სწორად გამიგოს, ეს არის არის ისეთი პირველადი მოხმარების პროდუქცია, როგორიცაა საკვები პროდუქტი, როგორიცაა მედიკამენტი და სხვა პროდუქტები, რომელთა რეალიზაცია ჩვენ დავუშვით", — განაცხადა მეზვრიშვილმა.

საგანგებო მდგომარეობის დასრულების შემდეგ რიგი შეზღუდვები კვლავ ძალაში დარჩა. დახურულ საჯარო სივრცეში სავალდებულოა პირბადეების ტარება, მათ შორის სავაჭრო ობიექტებში. ასევე, სავალდებულოა სოციალური დისტანციის დაცვაც. შეზღუდულია საზოგადოებრივი ტრანსპორტის მოძრაობა როგორც შიდა, ასევე, საქალაქთაშორისო. ამასთან, დახურულია სავაჭრო ცენტრები, ტანსაცმლისა და ფეხსაცმლის მაღაზიები.