ისრაელის პრემიერმინისტრი, ბენიამინ ნეთანიაჰუ სასამართლო პროცესზე მივიდა. მას კორუფციაში, თაღლითობასა და ნდობის ბოროტად გამოყენებაში ედება ბრალი.

პროცესზე მისვლის დროს ნეთანიაჰუმ განაცხადა, რომ ბრალდებები იმისკენაა მიმართული, რომ ის ნებისმიერი ფორმით ხელისუფლებას ჩამოაშორონ.

ისრაელში რამდენიმეთვიანი უთანხმოებისა და სამი არჩევნების შემდეგ საბოლოოდ კოალიციური მთავრობა ჩამოყალიბდა. ნეთანიაჰუმ და მისმა კონკურენტმა ბენი განცმა ძალაუფლება გაინაწილეს. შეთანხმების თანახმად, ბენი განცი ახლა ერთგვარად პრემიერის მოადგილეა, 18 თვეში კი მან და ნათანიაჰუმ თანამდებობები უნდა გაცვალონ.

სასამართლო მოსმენის დროს, რომელიც სულ ერთ საათს გაგრძელდა, ნეთანიაჰუ მთელი პროცესის განმავლობაში ფეხზე იდგა და ბრალდებულის სკამზე არ ჯდებოდა, სანამ რეპორტიორებმა დარბაზი არ დატოვეს.

შემდეგი პროცესი 19 ივლისსა ჩანიშნული.

ნეთანიაჰუ ისრაელის პრემიერი 2009 წლიდან არის. ქვეყნის კანონმდებლობის თანახმად, ლიდერი, რომელსაც ბრალს სდებენ, ვალდებული არაა თანამდებობა დატოვოს. ქვეყნის ისტორიაში პირველი მოქმედი ლიდერია, რომელიც სასამართლოში წარსდგა.