საქართველოს პრემიერ-მინისტრის თქმით, "ქართული ოცნების" ახალი გუნდის დაკომპლექტებაში ბიძინა ივანიშვილს ამ წუთამდე არანაირი მონაწილეობა არ მიუღია. ამის შესახებ გიორგი კვირიკაშვილმა ქართველ ჟურნალისტებს ლონდონში, თემის კომენტირებისას განუცხადა.

პრემიერის განმარტებით, ბიძინა ივანიშვილი ქართული ოცნების დამფუძნებელია და მას ძალიან მაღალი ავტორიტეტი აქვს, არა მხოლოდ ქართულ ოცნებაში, არამედ მთლიანად საქართველოში და გასაკვირი არაფერია იმაში, რომ შესაძლოა, მასთან, პარტიის შემდგომი მშენებლობის გზაზე, გარკვეული კონსულტაციები იმართებოდეს:

"ჩვენ უახლოეს მომავალში წარმოვადგენთ ახალ სახეებს. შემიძლია გითხრათ, რომ ახალი სახეების გუნდი შერჩეული იქნა პარტიის ლიდერების მხრიდან და ეს არის ძალიან გამჭვირვალე პროცესი. გაიმართა აბსოლუტურად საერთაშორისო პრაქტიკის შესაბამისი შესარჩევი პროცესი, გასაუბრებათა მთელი სერია და ამის შედეგად იქნა შერჩეული ახალგაზრდების ძალიან დიდი რაოდენობა. ინტერესი ქართულ ოცნებასთან და იმ გუნდთან შეერთებისა, რომელიც ახალი და ძველი წევრებისგან დაკომპლექტდება, ძალიან დიდია".

გიორგი კვირიკაშვილის თქმით, ოცნების ახალ გუნდში არ იქნებიან ადამიანები, რომლებსაც საქართველოს საგარეო პოლიტიკურ ვექტორთან მიმართებაში რაიმე ეჭვები ექნებათ.

კვირიკაშვილის ამ განცხადებას წინ უძღოდა ქართული ოცნების წევრის, პარლამენტარ თამაზ მეჭიაურის განცხადებები საქართველოს ნატოში გაწევრიანების უპერსპექტივობასთან შედარებით.