პრემიერმინისტრის, გიორგი გახარიას თქმით, მთავრობა მზად არის მივიდეს პარლამენტში და გასცეს პასუხი კითხვებს, თუ როგორ მუშაობდა საგანგებო მდგომარეობის დროს. მისი თქმით, ამის შესახებ წერილობით უკვე აცნობა პარლამენტის თავმჯდომარეს.

"საგანგებო მდგომარეობა ითვალისწინებს გარკვეულ დამატებით ანგარიშვალდებულებებს მთავრობის მხრიდან. ჩვენ გვესმის, რომ საზოგადოებაში არის დაგროვილი შეკითხვები მთავრობის მოქმედებაზე, სხვადასხვა მიმართულებით. საბოლოო ჯამში, კითხვები ეხება იმას, თუ როგორ მართავდა მთავრობა ქვეყანას ამ ორი თვის განმავლობაში. შესაბამისად, ჩვენ მზად ვართ, რომ ეს განმარტებები გავაკეთოთ პარლამენტში, ტრიბუნიდან", — განაცხადა მან მთავრობის სხდომაზე.

საგანგებო მდგომარეობა 31 მარტს დაწესდა და 22 მაისის ჩათვლით გაგრძელდება. როგორც გახარიამ დღეს განაცხადა, 23 მაისიდან საგანგებო მდგომარეობა და კომენდანტის საათი მოიხსნება.