საქართველოს პრეზიდენტმა 2019 წელს პარიზში არსებული ბინის გაქირავებით 21 600 ევრო მიიღო. ამის შესახებ მის დეკლარაციაშია მითითებული, რომელიც სალომე ზურაბიშვილმა 2020 წლის 30 იანვარს ჩააბარა. დოკუმენტში მითითებულია ხარჯები წინა წლის პირველი იანვრიდან 31 დეკემბრის ჩათვლით.

დეკლარაციის მიხედვით, 2019 წელს პრეზიდენტს ხელფასის სახით დაერიცხა 66 240 ლარი. თუმცა, ცნობილია, რომ ზურაბიშვილი ხელფასს არ იღებს — მან პრეზიდენტის რანგში თავის პირველივე ბრიფინგზე აღნიშნა, რომ უარს ამბობდა საქართველოში თანამდებობრივ სარგოზე და ფრანგული პენსიით იცხოვრებდა.

გარდა ამისა, 2019 წელს, ზურაბიშვილს დაგროვებით პენსიის სახით შემოსავალი აქვს 30 280 ევრო. 2018 წელს მისი პენსია საფრანგეთში 39 847 ევრო იყო.

დეკლარაციის მიხედვით, პრეზიდენტმა 2019 წელს დიზაინერულ მომსახურებაში თითქმის 14 000 დახარჯა. რაც შეეხება ქველმოქმედებას, ზურაბიშვილს 74 520 ლარი და 8 000 დოლარი აქვს დახარჯული.