როგორც ჩანს, ფანებს კიდევ დიდხანს მოუწევთ ლოდინი, რომ მარველის ერთ-ერთი ყველაზე ცნობილი სუპერგმირის, დედპულის შესახებ გადაღებული ახალი ფილმი იხილონ.

რამდენიმე დღის წინ ინტერვიუში კომიქსების ავტორმა რობ ლიფელდმა განაცხადა, რომ ის მარველის შემდეგი ხუთი წლის გეგმებს გაეცნო და მასში დედპულის მესამე ნაწილი ვერ იპოვა.

"შემდეგი ხუთი წლის განრიგი ვნახე და მასში დედპული არ იყო. არ მგონია, რომ შემდეგი ფილმი ხუთ წელზე ადრე ვიხილოთ", — ამბობს რობ ლინფელდი.

ამ ყველაფრის გამო კომიქსის ამ ცნობილი გმირის შემქმნელი კინომწარმოებელი კომპანიისგან იმედგაცრუებული ჩანს:

"ადამიანებისთვის უბრალოდ იმის თქმა, რომ ყველაფერი კარგადაა და შაქარყინულებით, იუნიქორნებითა და ცისარტყელითაა სავსე, ტყუილია. ვიღაცები ამბობენ, რომ "კი, ამ საკითხზე ვმუშაობთ", რაც იმას ნიშნავს, რომ "არა, საერთოდ არაფერს ვაკეთებთ".

როცა დისნეიმ 20th Century Fox შეიძინა 2019 წელს, მან X-Men-ის გმირებისა და დედპულის ფილმების შემდგომ წარმოებაზეც მოიპოვა უფლება. დედპულის ფილმები 2016 და 2018 წლებში გამოვიდა და ისინი კინოგაქირავებაში საკმაოდ წარმატებული პროექტები გამოდგა.

ამის მიუხედავად, ჯერჯერობით უცნობია, თუ როდის ვიხილავთ მესამე ნაწილს: 2022 წლამდე დაანონსებულ ფილმებიდან ცნობილია Black Widow, The Eternals, Shang-Chi, Blade და სიქველები ფილმებისა Doctor Strange, Thor: Ragnorak, Captain Marvel, Black Panther და Spider-Man: Far From Home.

იმედია, დისნეიში გაითვალისწინებენ, რომ ანიმაციების ხელახალ ეკრანიზაციებზე მეტად მილიონობით ფანი საყვარელი სუპერგმირების ისტორიების გაგრძელებას ელოდება და დედპულის შემდეგი ფილმის სანახავად, როგორც კომიქსის ავტორი ამბობს, მართლა მინიმუმ ხუთი წელი ლოდინი არ დაგვჭირდება.

ფოტო: Giphy