ქართული ოცნების ერთ-ერთი ლიდერი, ირაკლი სესიაშვილი, 17 პოლიციის მიერ ლგბტ დროშის ჩამოხსნის კომენტირებისას ამტკიცებს, რომ ქვეყანაში სიტყვისა და გამოხატვის თავისუფლება დაცულია.

მას რუსთავი 2-ის ეთერში ჰკითხეს კაფე გალერის შენობის ფანჯრიდან ლგბტ დროშის ჩამოხსნის მოთხოვნაზე, რაც პოლიციამ დაადასტურა და რის შემდეგაც დროშა ფანჯარაზე აღარ იყო.

"ამ ქვეყანაში სიტყვის თავისუფლება, გამოხატვის თავისუფლება არის დაცული და მე მგონი, საზოგადოება ამას კარგად ხედავს. რაც შეეხება პოლიციის მოქმედებას ამ ფაქტთან დაკავშირებით, პოლიციის ვალდებულებაა და ეს კანონშიც უწერია, რომ თუ შეიძლება ამ თუ იმ მოქმედებას მოყვეს სიტუაციის დაძაბვა და პოლიციას აქვს იმის საშუალება, რომ მოახდინოს პრევენციული ღონისძიების გატარება, ეს მათი კანონიერი ვალდებულებაა. მე ვერ ჩავერევი პოლიციის ამ საქმიანობაში, რაც შეეხება სხვა მსგავსი ტიპის აქციებს თუ პროცესებს, აქაც თუ დაცული იქნება უსაფრთხოების ნორმები, თავისთავად ცხადია, სახელმწიფო იქნება კანონის და კონსტიტუციის სადარაჯოზე", — თქვა სესიაშვილმა.

ჟურნალისტის კითხვას, რატომ არის კანონი შერჩევითი და რატომ არ ეძლევა მოქალაქეს ფანჯრიდან დროშის გადმოფენის უფლება, როცა საპატრიარქო მსვლელობას მართავს, დეპუტატმა ასე უპასუხა:

"თქვენი შეფასება არის მიკერძოებული. პოლიციის მოქმედება ეფუძნებოდა პრევენციას, რომ არ მომხდარიყო სიტუაციის გართულება და დაძაბვა".

აქვე, სესიაშვილმა თქვა, რომ წლების განმავლობაში ქართული ოცნების ხელისუფლება ყოველთვის ცდილობს, რომ მაქსიმალურად იყოს დაცული მოქალაქეების კონსტიტუციითა და კანონით გათვალისწინებული უფლებები.

კაფე გალერის შენობის ერთ-ერთ ფანჯარაზე გადმოფენილი ლგბტ დროშა პოლიციამ ადმინისტრაციას ჩამოახსნევინა. TV პირველის კადრებში ჩანს, როგორ შედიან შსს-ს წარმომადგენლები შენობაში, შემდეგ კი ფანჯრიდან დროშა იხსნება.