ჩეჩნეთის რესპუბლიკის ლიდერი, რამზან კადიროვი გუდერმესში იმ ექიმების გათავისუფლებას მოითხოვს, რომლებმაც COVID-19-ის მქონე პაციენტებთან მუშაობისთვის დამცავი აღჭურვილობის სიმცირეზე ისაუბრეს. ამის შესახებ კადიროვმა მთავრობის სხდომაზე განაცხადა.

"პროვოკატორები უნდა გაათავისუფლო. ყველაფერი გვყოფნის — აპარატურა, ნიღბები, ჟანგბადი, მედიკამენტები. ჩვენ, პირიქით, სხვა რეგიონებს შეგვიძლია, დახმარება გავუწიოთ", — აღნიშნა კადიროვმა.

რადიო თავისუფლების რუსული ბიუროს ინფორმაციით, სოციალურ ქსელებში გავრცელდა აქციის ვიდეო, რომელშიც ექიმები და ექთნები საუბრობდნენ, რომ კლინიკაში, სადაც კორონავირუსით ინფიცირებულ პაციენტებს იღებენ, პირადი დაცვის საშუალებები არ ჰყოფნით. ამის შემდეგ კლინიკის მთავარი ექიმი და აქციის მონაწილე ერთ-ერთი ექიმი გაათავისუფლეს. ახალი მთავარი ექიმი ჩეჩნეთის ყოფილი ვიცე-პრემიერი მუსა ახმადოვი გახდა.

სახელისუფლებო ტელეკომპანია გროზნიმ გუდერმესში აქცია "უსაფუძვლო პანიკა", ხოლო მათ მონაწილეებს "პროვოკატორები" უწოდა. მეორე დღეს ეთერში ბოდიშის მოხდის სიუჟეტი გავიდა, რომელშიც სამი ექთანი და ორი ექიმი ამბობდნენ, რომ აღჭურვილობის სიმცირეზე სოციალურ ქსელში ინფორმაციას ავრცელებდნენ. მათ თავიანთი ნათქვამი უკან წაიღეს. გარდა ამისა, მათ ბოდიში მოიხადეს გავრცელებული ინფორმაციისთვის, რომ COVID-19-ით ექიმი გარდაიცვალა — ისინი ამტკიცებენ, რომ ქალს კორონავირუსი არ ჰქონია.