თბილისის მერია ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეს ანძას თურქმენეთის დროშის ფერებში გაანათებს.

ასე ეხმაურება უწყება ორგანიზაცია თბილისი პრაიდის განცხადებას თბილისის ანძის ლგბტქ ფერებში განათების შესახებ.

მერია განცხადებაში განმარტავს ანძის განათების პრინციპს და აღნიშნავს, რომ ეს სხვადასხვა ორგანიზაციის, უწყებისა თუ საელჩოს მიმართვის შედეგად ხდება. მათი ინფორმაციით, 17-18 მაისის განათებაზე რამდენიმე ადგილობრივი ორგანიზაციია და ერთი მეგობარი ქვეყნის წერილია შესული.

"შესაბამისად, ჩვენ ვერ დავარღვევთ ტრადიციას და ვერ გამოვტოვებთ ანძის განათებას თურქმენეთის დროშის ფერებში, მათ ეროვნულ დღესასწაულთან დაკავშირებით", — აღნიშნავენ მერიაში.

ამასთან, უწყებაში ამბობენ, რომ სხვადასხვა ორგანიზაციის მრავალფეროვნების და მათი მოთხოვნების განსხვავებულობის გამო, მომდევნო დღეს, 18 მაისს ანძა თეთრად განათდება და ასე ყველას მიმართ გამოხატავენ სოლიდარობას.

"მიღებულია ისეთი გადაწყვეტილება, რომლითაც ყველას მიმართ გამოვხატავთ პატივისცემასა და სოლიდარობას — შემდგომ დღეებში ანძა განათდება თეთრად. ამით გვინდა აღვნიშნოთ, რომ ჩვენი ყველა მოქალაქე არის ერთი მთლიანი და არა მსოფლმხედველობის, ან ცხოვრების წესის მიხედვით დანაწევრებული საზოგადოება.

ამ ქვეყანაში ტოლერანტობას ვერასდროს ჩაანაცვლებს შეუწყნარებლობა და ფობიები. ჩვენ ქვეყანაში სამოქალაქო უფლებები და ვალდებულებები ნაწილდება ყველაზე თანაბრად, მათი სექსუალური, ეთნიკური თუ კონფესიური კუთვნილების მიუხედავად", — აღნიშნავს მერია.

Tbilisi Pride-მა თბილისის მერს, კახა კალაძეს 14 მაისს წერილით მიმართა, რომ 17 მაისს ქალაქის ანძა ლგბტ დროში ფერებში განათდეს. როგორც Tbilisi Pride-ს წევრმა, გიორგი თაბაგარმა On.ge-ს უთხრა, ანძის განათება სოლიდარობისა და მხარდაჭერის ნიშანი იქნება.