გამარჯვებული საქართველოს ლიდერის, ირაკლი ოქრუაშვილის თქმით, შესაძლოა ნაციონალური მოძრაობის ხელისუფლებაში ყოფნის პერიდოში, მისი დაკავება "გადამლაშებების" შედეგი იყო. ამ თემაზე მან TV პირველის ეთერში ისაუბრა, თუმცა არ დააკონკრეტა რას გულისხმობდა.

“სააკაშვილმა რომ დამიჭირა, იქ რაღაცა.. ჩემი გადამლაშებების შედეგები შეიძლება იყო, ასე ვიტყოდი. [...] ის შეცდომა დავუშვი, რომელსაც ივანიშვილი უშვებდა, პირობითად გუშინ წინ, არასაეთეროდ ვიტყვი", — თქვა ოქრუაშვილმა.

პოლიტიკოსმა აღნიშნა, რომ ამ ყველაფრის შემდეგ არავის მიმართ არ აქვს რევანშის გრძნობა.

ირაკლი ოქრუაშვილი ნაციონალური მოძრაობის ხელისუფლებაში ყოფნის დროს მინისტრთა კაბინეტის წევრი იყო და ამავე პარტიის მმართველობსი დროს დააკავეს. პოლიტიკოსი ბოლო პატიმრობიდან პრეზიდენტის, სალომე ზურაბიშვილის შეწყალების შემდეგ გათავისუფლდა. მან ციხე 15 მაისს დატოვა.

ვინ არის ირაკლი ოქრუაშვილი

ირაკლი ოქრუაშვილი ნაციონალური მოძრაობის მმართვეობის პერიოდში შინაგან საქმეთა, თავდაცვისა და ეკონომიკის მინისტრის პოსტებს იკავებდა. 2006 წლის 10 ნოემბერს, მთავრობაში ცვლილებების შედეგად, ირაკლი ოქრუაშვილმა თავდაცვის მინისტრის პოსტი დატოვა და ეკონომიკური განვითარების მინისტრი გახდა. პრეზიდენტ სააკაშვილის სიტყვებით, ეს გადაადგილება "განაპირობა იმ ფაქტმა, რომ რუსეთის მთავარი სამიზნე საქართველოს ეკონომიკაზე შეტევაა". ზოგიერთმა ოპოზიციურმა ძალამ და პოლიტოლოგმა კი ოქრუაშვილის გადაყენება მის მიერ ცხინვალის რეგიონის ტერიტორიაზე კონტროლის აღდგენის ვადების თაობაზე კატეგორიულ განცხადებებს დაუკავშირა.1 კვირის შემდეგ, 17 ნოემბერს, ოქრუაშვილმა ეკონომიკური განვითარების მინისტრის თანამდებობა თავისი სურვილით დატოვა.

2007 წლის 25 სექტემბერს ოქრუაშვილმა პრეზიდენტი სააკაშვილი ანტისახელმწიფოებრივ ქმედებებსა და მკვლელობების შეკვეთებში დაადანაშაულა. 2 დღის შემდეგ ის მის მიერ შექმნილი პარტიის — ერთიანი საქართველოსთვის ოფისში დააკავეს. ექს-მინისტრს თანამდებობის ბოროტად გამოყენებაში, ფულის გამოძალვასა და სამსახურეობრივ გულგრილობაში დასდეს ბრალი.

იმავე წლის ოქტომბერში მან უარყო სააკაშვილის წინააღმდეგ წაყენებული ბრალდებები და აღიარა დანაშაული, რის შემდეგაც 2007 წელს იძულებით იქნა დეპორტირებული საქართველოდან და ცხოვრობდა საფრანგეთში, სადაც მიიღო პოლიტიკური თავშესაფარი. 2012 წლის 20 ნოემბერს დაბრუნდა საქართველოში და დაპატიმრებული იქნა, რის შემდეგაც გადაყვანილი იქნა გლდანისციხეში.

2013 წელს ირაკლი ოქრუაშვილი სცნეს პოლიტიკურ დევნილად, სასამართლომ ყველა ბრალდება მოუხსნა და გაათავისუფლა.