უმრავლესობის ლიდერის, რატი იონათამიშვილის აზრით, ქართულ ოცნებას ნაციონალური მოძრაობა ევროპულ სტანდარტებზე არ უნდა ელაპარაკებოდეს, რადგან სტრასბურგში ისინი 53-ჯერ გაასამართლეს.

"რაც შეეხება ნაციონალურ მოძრაობას, ევროპულ სტანდარტებს ნუ გველაპარაკება ის პოლიტიკური ორგანიზაცია, რომელიც, სტრასბურგის ევროპულ სასამართლოს 53 საქმეზე ჰყავს გასამართლებული. ასე რომ, მოვუწოდებ და ვურჩევ მათ, რომ დაიცვან შეთანხმების პირველი ნაწილიც და მიიღონ მონაწილეობა და შეასრულონ ნაკისრი ვალდებულებები", — თქვა რატი იონათამიშვილმა.

დეპუტატმა აღნიშნა, რომ საარჩევნო სისტემასთან დაკავშირებულ საკონსტიტუციო ცვლილებებს საფრთხე არ ემუქრება და ის აუცილებელად იქნება განხორციელებული. მისი თქმით, თუ რომელიმე პარტია "მაინც იკადრებს" და პროექტს მხარს არ დაუჭერს, ეს მის რეპუტაციას დააზიანებს.