საქართველოს პარლამენტი თავმჯდომარის განცხადებით, თუ ქვეყანაში კორონავირუსით ინფიცირების მაჩვენებლის შემცირების ტენდენცია შენარჩუნდა, ეს იქნება შეზღუდვების მოხსნის დაჩქარების საფუძველი. ამის შესახებ არჩილ თალაკვაძემ ბიუროს სხდომაზე განაცხადა.

"საბედნიეროდ, ბოლო დღეების განმავლობაში ინფიცირების ახალი შემთხვევების რაოდენობა უკვე ნაკლებია გამოჯანმრთელებულთა რაოდენობაზე. თუ ეს ტენდენცია გაგრძელდა, შენარჩუნდა და კლებითი რეჟიმი იქნება მომავალი დღეების განმავლობაში, რა თქმა უნდა, ეს უკვე მყარ საფუძველს წარმოადგენს, რომ ჩვენ შეზღუდვების მოხსნის პროცესი უფრო დავაჩქაროთ და უფრო სწრაფად აღვადგინოთ ეკონომიკური და სოციალური ფუნქციები, რომელიც ამ მომენტისთვის არის შეჩერებული საზოგადოებრივი ჯანდაცვის მიზნებიდან გამომდინარე", — ამბობს თალაკვაძე.

საქართველოში საგანგებო მდგომარეობა და კომენდანტის საათის ჯერ კიდევ ძალაშია. შეზღუდვების ნაწილი გაუქმდა, ნაწილი კი რჩება.

ქვეყანაში ამ დროისთვის კორონავირუსის 647 დადასტურებული შემთხვევაა, მათგან ნახევარზე მეტი, 372 ადამიანი უკვე გამოჯანმრთელდა. გარდაიცვალა 11 ადამიანი. კარანტინის რეჟიმში იმყოფება 4461, ხოლო სტაციონარში მეთვალყურეობის ქვეშ 394 პირი.