მთავრობის გადაწყვეტილებით, ყველა ფერმერი, რომელსაც აქვს დარეგისტრირებული მიწა, ყოველ 1 ჰექტარზე 150 ლიტრ დიზელის საწვავს საბაზრო ფასზე 1 ლარით იაფად მიიღებს. ამის შესახებ პრემიერმინისტრმა გიორგი გახარიამ განაცხადა.

"ყველა ფერმერი 1 ჰექტარზე მიიღებს 150 ლიტრ დიზელის საწვავს, რომელიც გარანტირებულად იქნება საბაზრო ფასზე 1 ლარით იაფი. საერთოდ, სასოფლო სამეურნეო საქმიანობისთვის საწვავის ფასი არის კრიტიკულად მნიშვნელოვანი და ჩვენ უკვე ვმუშაობთ ამ პრობლემის გადასაწყვეტად, არა მხოლოდ კრიზისში დღეს, წელს, არამედ მომავალი წლებისთვის. ერთმნიშვნელოვნად შემიძლია გითხრათ გარანტირებულად, რომ აგროდიზელის ფასი მნიშვნელოვნად იაფი იქნება, ვიდრე დიზელის ფასი ბაზარზე", — განაცხადა გახარიამ.

გახარიას თქმით, ფერმერებს აღნიშნული დახმარებისთვის მიმართვა 20 მაისიდან შეეძლებათ.

შეღავათები, რომელსაც სახელმწიფო ფერმერს სთავაზობს, ყველას შეეხება, ვინც წლის ბოლომდე მიწის რეგისტრაციას მოახერხებს.

სოფლის მეურნეობის მინისტრის, ლევან დავითაშვილის განცხადებით, ერთ-ერთი მნიშვნელოვანი წინაპირობაა, ფერმერები იყვნენ რეგისტრირებული სამინისტროში, ფერმერთა სპეციალურ რეესტრში. მისივე თქმით, დახმარების მისაღებად საჭიროა ლიბერთი ბანკის ბარათები.

"ლიბერთი ბანკი ყველაზე მეტად არის წარმოდგენილი რეგიონებსა და სოფლებში და დიდწილად არის ფერმერების ბანკი. ის ადამიანები, რომლებიც უკვე ფლობენ ლიბერთი ბანკის ბარათს და ისინი მყისიერად შეძლებენ სერვისით სარგებლობას. ხოლო ფერმერები, რომლებსაც ეს ბარათი არ გააჩნიათ ერთი თვის განმავლობაში მიიღებენ ბარათს რეგისტრირებული მიწის ფლობის შემთხვევაში", — განაცხადა დავითაშვილმა.