უკრაინის პრეზიდენტის თანაპარტიელი, საპარლამენტო ფრაქცია ხალხის მსახურის თავმჯდომარე დავით არახამია ამბობს, რომ მიხეილ სააკაშვილი, უკრაინისთვის ძალიან კარგი შენაძენია. ამ თემაზე ინტერვიუ მან მთავარ არხს მისცა.

"ვფიქრობ უკრაინისთვის ეს ძალიან კარგი შენაძენია, სააკაშვილს აქვს მდიდარი გამოცდილება მნიშვნელოვანი რეფორმების განხორციელების კუთხით. [...] ვინაიდან საქართველო სწრაფი რეფორმების ჩატარების კუთხით არის მსოფლიოს ერთ-ერთი ლიდერი და საბჭოს რეფორმა, რომელიც სააკაშვილის დროს განხორციელდა შედის რეფორმების სამეულში", — არახამიას ინტერვიუს თარგმანს მთავარი არხი ავრცელებს.

დეპუტატმა აღნიშნა, რომ უკრაინას პირველ რიგში, დერეგულირების რეფორმა სჭირდება, რადგან ქვეყანაში არსებული ბიუროკრატიული აპარატი ბიზნესის სწრაფ განვითარებას უშლის ხელს. მისი თქმით, უკრაინას "სააკაშვილი ძალიან სჭირდება", რადგან ახლოვდება ე.წ კორონა ეკონომიკის დრო, ამ პერიოდში კი მნიშვნელოვანია სწრაფად, გაბედულად და ეფექტურად იმოქმედონ.

მიხეილ სააკაშვილი უკრაინის რეფორმების აღმასრულებელი კომიტეტის თავმჯდომარედ დღეს, 7 მაისს დაინიშნა. გადაწყვეტილებას ხელი პრეზიდენტმა მოაწერა.

22 აპრილს მიხეილ სააკაშვილმა განაცხადა, რომ უკრაინის პრეზიდენტმა ვოლოდიმირ ზელენსკიმ მას რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

ამავე თემაზე:

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

პეტრო პოროშენკოს პრეზიდენტობის დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პრეზიდენტის ბრძანებით, ის რეადმისიით პოლონეთში დააბრუნეს. საპრეზიდენტო არჩევნებში გამარჯვების შემდეგ, ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ის უკრაინაში დაბრუნდა.