უმრავლესობის წევრის, ირაკლი კობახიძის თქმით, 1 თვითაც რომ გახდეს საჭირო საგანგებო მდგომარეობის გაგრძელება, სრულიად შესაძლებელია, რომ საკონსტიტუციო ცვლილებების მიღება სათანადო დროში, ოქტომბერში დაგეგმილ არჩევნებამდე დაასრულონ.

მისი თქმით, 31 ოქტომბრის არჩევნების ახალი სისტემით ჩატარებას არავითარი საფრთხე არ შეექმნება.

"დრო არის საკმარისი ყველაფრისთვის. შესაბამისად, ჩვენ დაველოდებით მოვლენების განვითარებას, ვნახავთ იქნება თუ არა საჭირო საგანგებო მდგომარეობის გაგრძელება. თუ არ გახდება საჭირო, ამ შემთხვევაში ივნისის ბოლომდე ესწრება ცვლილებების შეტანა, თუ გახდა გაგრძელება ამ შემთხვევაში ივლისში დასრულდება საკონსტიტუციო ცვლილებების მიღება და ესეც არის საკმარისი დრო იმისათვის, რომ ჩვენ სათანადოდ დავიწყოთ საარჩევნო კამპანია, რომ 31 ოქტომბერს ჩავატაროთ თავისუფალი და სამართლიანი არჩევნები", — განაცხადა კობახიძემ.

საერთაშორისო გამჭვირვალობა — საქართველო აცხადებს, რომ უკვე უნდა დაიწყოს მსჯელობა საპარლამენტო არჩევნების უსაფრთხოდ ჩატარების საკითხზე.

ორგანიზაციის აზრით, კორონავირუსის პანდემიასთან დაკავშირებული პრობლემების მოგვარება სასიცოცხლოდ მნიშვნელოვანია, თუმცა არც ქვეყნის დემოკრატიული განვითარებისთვის მნიშვნელოვანი საკითხები უნდა დავივიწყოთ.

TI-ში აღნიშნავენ, რომ კვლავ უცნობია, კონკრეტულად როდის და როგორ აპირებს ქართული ოცნება კონსტიტუციური და სხვა საკანონმდებლო ცვლილებების მიღებას. მათი თქმით, იმის გათვალისწინებით, რომ ქვეყანაში საგანგებო მდგომარეობაა გამოცხადებული, რა დროსაც კონსტიტუციის შეცვლა შესაძლებელი არ არის, მნიშვნელოვანია, საზოგადოებამ იცოდეს კონკრეტული გეგმები ამ საკითხთან დაკავშირებით.

ორგანიზაცია მოუწოდებს ხელისუფლებას, ამ საკითხზე აქტიური კონსულტაციები დაიწყოს ცენტრალურ საარჩევნო კომისიასთან, პოლიტიკურ პარტიებთან, არჩევნებზე მომუშავე ადგილობრივ სამოქალაქო საზოგადოების ორგანიზაციებთან, მეგობარი ქვეყნების წარმომადგენლობებთან და საერთაშორისო ორგანიზაციებთა