კორონავირუსის პანდემიის დასასრული ჯერჯერობით ჰორიზონტზე არ ჩანს, თუმცა ამერიკის ზოგიერთ შტატში აკრძალვები უკვე მოიხსნა.

მაგალითად, ფლორიდაში სანაპიროები პირველი მაისიდან გაიხსნა. შეზღუდვების მოხსნა განსაკუთრებით მედიკოსებს აშფოთებთ. ადგილობრივმა იურისტმა, დენიელ ალფელდერმა პროტესტი ორიგინალურად გამოხატა და სანაპიროს ცელიანი სიკვდილის ფორმაში გამოწყობილი ეწვია. მისი განმარტებით, ასე სურდა შეეხსენებინა მოქალაქეებისთვის სახლში დარჩენის აუცილებლობა.

ვიდეოში, რომელიც ტვიტერზე გავირუსდა, ის ABC-ის პირდაპირ ეთერში ერთვება.

"სანაპირო ძალიან მიყვარს, აქ წლები მაქვს გატარებული, მაგრამ მგონია, რომ მისი გახსნა მეტისმეტად ნაადრევია. კორონავირუსის გავრცელებას ადამიანების თავშეყრა ხელს შეუწყობს. კონტროლს დავკარგავთ, რისთვისაც მზად არ ვართ", — განაცხადა მან.

ფოტო: Devon Ravine / AP

ფლორიდის შტატში კორონავირუსის 35 463 შემთხვევაა დაფიქსირებული, გარდაცვლილია 1 364 ადამიანი, გამოჯანმრთელებულთა რიცხვი უცნობია.