კომპანიები, რომლებიც საშემოსავლო გადასახადზე შეღავათის სარგებლობისა და დასაქმებულების შესახებ არასწორ ინფორმაციას წარმოადგენენ, დაჯარიმდებიან. ამის შესახებ ფინანსთა მინისტრმა, ივანე მაჭავარიანმა განაცხადა.

მისივე თქმით, აღნიშნული გადაწყვეტილება მიზნად მცდარი მონაცემების თავიდან არიდებასა და გადამხდელებზე პასუხისმგებლობის გადანაწილებას ისახავს.

"ერთი მხრივ, ჩვენ შეღავათი გვექნება კომპანიებისთვის საშემოსავლო გადასახადზე და მეორე მხრივ, 6 თვის განმავლობაში ჯამში 1 200 ლარის დახმარება გქვექნება იმ ადამიანებზე, ვინც ოფიციალურად იყო დასაქმებული და ამავდროულად ან დროებით არიან უხელფასოში ან უბრალოდ, ხელფასს ვერ იღებენ ამ პერიოდის განმავლობაში. ორივე შემთხვევაში ჩვენ საგადასახადო კოდექსში ვამატებთ ნორმას, რომლის მიხედვითაც კომპანიებს სწორი ინფორმაციის წარდგენის ვალდებულებას ეკისრებათ. თუ ისინი არასწორად მოგვაწვდიან ინფორმაციას ამ შემთხვევაში ამ შეღავათის ორმაგი ოდენობით დაჯარიმდებიან", — განაცხადა მაჭავარიანმა.