ნაციონალური მოძრაობა მოითხოვს, მთავრობის ანტიკრიზისულ გეგმაზე სამსჯელოდ პარლამენტი შეიკრიბოს და პარალელურად, პარტია დროებით გამოვა ბოიკოტის რეჟიმიდან. ამის შესახებ დეპუტატმა სალომე სამადაშვილმა მთავარი არხის ეთერში, მთავარ აქცენტებში განაცხადა. მისი თქმით, 4 მაისს პარტია მათი "ანტიკრიზისული გადაწყვეტილების" შესახებ ოფიციალურ განცხადებას გაავრცელებს.

"დღეს საქართველოს მოქალაქეეების გადარჩენას სჭირდება, რომ პარლამენტმა დაიწყოს ფუნქციონირება და პარლამენტში ჩვენ განვიხილოთ, თაღლითური სქემა, რომელიც შექმნა ქართულმა ოცნებამ, რომელიც არის მისი წინასაარჩევნო ბიუჯეტი", — ამბობს სალომე სამადაშვილი.

უკვე რამდენიმე თვეა ოპოზიციური პარტიები, ევროპული საქართველო და ნაციონალური მოძრაობა საპარლამენტო ბოიკოტს აგრძელებს. პარტიებში აცხადებენ, რომ ბოიკოტი გაგრძელდება მანამ, სანამ მათი მოთხოვნა პოლიპატიმრების გათავისუფლებაზე არ დაკმაყოფილდება. პარტიებმა ბოიკოტი პროპორციულ საარჩევნო სისტემაზე კანონპროექტის ჩაგდების შემდეგ გამოაცხადეს.