საქართველოს მთავრობა კორონავირუსთან დაკავშირებით ინფორმაციას Telegram-ის საშუალებითაც გაავრცელებს.

ამის შესახებ მთავრობის Facebook გვერდზე დაიწერა, სადაც მითითებულია მთავრობის ოფიციალური ტელეგრამ არხიც.

ტელეგრამი 2013 წელს, რუსეთში, პაველ და ნიკოლაი დუროვებმა დააფუძნეს. ახალი სოციალური ქსელის შემქმნელები რუსეთში პოპულარული VKontakte.ru-ს დამფუძნებლებიც არიან, რომელიც მოგვიანებით Mail.ru ჯგუფმა იყიდა. ტელეგრამს რუსეთში მუშაობა შეეზღუდა, რის შემდეგაც დამფუძნებლებმა ქვეყანა დატოვეს.

ტელეგრამს ამ დროისთვის 365 მილიონი მომხმარებელი ჰყავს. კომპანიის ოფიციალური გვერდის ინფორმაციით, ტელეგრამის მთავარი აქცენტი სისწრაფე, უსაფრთხოება და სიმარტივეა. აღსანიშნავია, რომ ამ აპლიკაციას მომხმარებელთა ნაწილი სწორედ დაშიფრული მიმოწერის მიზნით იყენებს.

ტელეგრამის გარდა, საქართველოს მთავრობა კორონავირუსთან დაკავშირებით ინფორმაციის გასავრცელებლად ფეისბუქსა და ტვიტერს იყენებს. StopCov.ge-ზე ოფიციალური გვერდების განყოფილებაში მითითებულია მთავრობისა და პრემიერმინისტრ გახარიას Twitter-ის ანგარიშები, ასევე, მთავრობის ადმინისტრაციის გვერდი და ფეისბუქ გვერდი სახელწოდებით "გახარია".

ამ დროისთვის საქართველოში კორონავირუსის დადასტურებული 420 შემთხვევაა, მათ შორის გამოჯანმრთელებულია 111, ხოლო გარდაცვლილი — 5 ადამიანი. კარანტინის რეჟიმში 5223 პირი იმყოფება, სტაციონარში მეთვალყურეობის ქვეშ კი — 584.