18 ნოემბერს, 12 საათზე, საქართველოს პარლამენტის მე-9 მოწვევის პარლამენტის პირველ სხდომას პრეზიდენტი გიორგი მარგველაშვილი გახსნის.

პარლამენტის პრესსამსახურის ცნობით, პრეზიდენტის გამოსვლის შემდეგ სიტყვა გადაეცემა პარლამენტის უხუცეს წევრს, რომელიც პარლამენტის თავმჯდომარის არჩევამდე პირველ სხდომას წაუძღვება.

პარლამენტის პირველსავე სხდომაზე, თავისი უფლებამოსილების ვადით, ფარული კენჭისყრით, პარლამენტის სრული შემადგენლობის უმრავლესობით, აირჩევა პარლამენტის თავმჯდომარე.

სიითი შემადგენლობის უმრავლესობით კი დეპუტატები პარლამენტის თავმჯდომარის პირველ მოადგილეს და მოადგილეებს აირჩევენ. ახალარჩეული პარლამენტის პირველი სხდომა კომიტეტების თავმჯდომარეების არჩევით დასრულდება.