განახლება:
ზოომარტმა მიკროავტობუსით გადაადგილებაზე ნებართვა მიიღო — ზოომარტი;
ცრუ ინფორმაცია გაავრცელეს — თბილისის ტრანსპორტის სამსახურის უფროსი ზოომარტზე.

ზოომაღაზია ზოომარტი აცხადებს, რომ თანამშრომლების გადაყვანისთვის კერძო მიკროავტობუსებზე ნებართვა ამ დრომდე არ მიუღიათ, რის გამოც 26 აპრილიდან თბილისში 12-ვე ფილიალის დაკეტვა უწევთ.

როგორც ზოომარტის განცხადებაშია აღნიშნული, აქამდე თანამშრომლების გადაადგილება ტაქსით ხდებოდა, თუმცა უკვე მე-7 დღეა კონსულტანტებს ყოველდღიურად 10 კილომეტრზე მეტი მანძილის დაფარვა ფეხით უწევთ. მათივე თქმით, ანალოგიური სიტუაციაა ონლაინგაყიდვებთან დაკავშირებითაც.

"გვესმის, რომ ქვეყანაში შექმნილია რთული ვითარება, სახელმწიფო დგას უამრავი გამოწვევების წინაშე და ჩვენი პრობლემები შესაძლოა არც თუ ისე პრიორიტეტულია. თუმცა, დამატებითი ბარიერების ფონზე ჩვენთვის ასეთ რეჟიმში შეუძლებელი ხდება ფუნქციონირება და ჩვენი თანამშრომლების ჯანმრთელობას ვერ დავაყენებთ საფრთხის ქვეშ. წვიმიან ამინდში ფეხით გადაადგილების გამო რამდენიმე მათგანს უკვე აღენიშნება მაღალი ტემპერატურა და დღეიდანვე შესაძლოა, რამდენიმე ფილიალი ვერ გაიხსნას", — ნათქვამია ზოომარტის განცხადებაში.

თბილისში M2 კატეგორიის ტრანსპორტით, ანუ მიკროავტობუსებით გადაადგილებაზე ნებართვას მერია გასცემს. როგორც უწყებაში On.ge-ს განუცხადეს, ყველა შემოსულ წერილს იმავე დღეს პასუხობენ. მათივე თქმით, ზოომარტთან დაკავშირებით ინფორმაციას ქსელშიც გადაამოწმებენ.