თბილისის მერიის ტრანსპორტის საქალაქო სამსახურის ხელმძღვანელი, ვიქტორ წილოსანი ამბობს, რომ მიკროავტობუსებით თანამშრომლების გადაყვანასთან დაკავშირებით მაღაზია ზოომარტმა ცრუ ინფორმაცია გაავრცელა.

ზოომარტი აცხადებდა, რომ თანამშრომლების გადაყვანისთვის კერძო მიკროავტობუსებზე ნებართვა ამ დრომდე არ მიუღიათ, რის გამოც 26 აპრილიდან თბილისში 12-ვე ფილიალის დაკეტვა უწევდათ.

როგორც ვიქტორ წილოსანი ფეისბუქზე წერს, ზოომარტისგან პირველი განცხადება 21 აპრილს მიიღეს, თუმცა უარი უთხრეს, რადგან მოთხოვნა არ იყო მგზავრების ავტობისებით ან მიკროავტობუსებით გადაყვანაზე. მისივე თქმით, შემდეგი მეილი 22 აპრილს 7 სატრანსპორტო საშუალებაზე მიიღეს, მათ სცადეს საკონტაქტო პირთან დაკავშირება, თუმცა მან ზარებს არ უპასუხა.

"აღნიშნული ზარის მიზეზი იყო ის, რომ განმცხადებლისთვის განგვემარტა, რომ მის მიერ მოთხოვნილი 7 სატრანსპორტო საშუალებიდან, ერთი სატრანსპორტო საშუალება მითითებული სახელმწიფო ნომრით არ იძებნებოდა, ხოლო 5 სატრანსპორტო საშუალება წარმოადგენდა სედანის ტიპის ავტომობილს, რომლებზეც სააგენტოს უფლებამოსილება არ ჰქონდა, რომ გაეცა მოძრაობის ნებართვა", — წერს წილოსანი.

ტრანსპორტის სამსახურის ხელმძღვანელს პოსტის კომენტარებში მაღაზია ზოომარტმაც უპასუხა:

"ჩვენი რჩევაა, რომ კარგად გადაამოწმოთ რამდენად გამართულად მუშაობს თქვენი საკომუნიკაციო არხები, რომ მთელი დღის და ღამის განმავლობაში არ გვიწევდეს ტელეფონზე ჩამოკიდება, უსასრულოდ. აქვე გთხოვთ, საჯაროდ დააფიქსიროთ როდის მიიღებს კომპანია საშვებს, რომ შევძლოთ გამართულ რეჟიმში მუშაობა და ჩვენი თანამშრომლების ჯანმრთელობას საფრთხე არ შეექმნას. ასევე, ძალიან ვწუხვართ, რომ ამ ყველაფერს პირად საუბრებში უწოდებთ, როგორც პოლიტიკურად ანგაჟირებულს".

როგორც წილოსანი პასუხობს, მერია მხოლოდ M2 და M3 კატეგორიაზე იძლევიან საშვს. რაც შეეხება პირად საუბრებს, ის ამბობს, რომ პირადი საუბრები არ ყოფილა და არ იცის რაზე საუბრობენ.