ქართული ოცნების მტკიცებით, ბიძინა ივანიშვილის "ხელწერა" ხალხის და ქვეყნის სამსახურში ყოველგვარი პიარის გარეშე დგომაა. პარტიაში ამბობენ, რომ ამაზე ათწლეულების განმავლობაში მის მიერ "პრაქტიკულად ანონიმურ რეჟიმში ნაკეთები საქმეები ყველაზე ნათლად მეტყველებს".

ამის შესახებ საუბარია ქართული ოცნების მიერ გავრცელებულ ვრცელ განცხადებაში, რომლის მიზეზი ბიძინა და ბერა ივანიშვილების TikTok ვიდეოს კრიტიკა გახდა.

პარტია ბიძინა ივანიშვილის ერთი დღის განრიგს აღწერს. მათი მტკიცებით, ამას მხოლოდ იმიტომ აკეთებენ, რომ ოპონენტები ცდილობენ კრიტიკის "აბსურდული ხაზი" განავითარონ, ქართული ოცნება კი თავს ვალდებულად მიიჩნევს საზოგადოებას დეტალურად მიაწოდოს ინფორმაცია, "თუ რით არის დაკავებული ბიძინა ივანიშვილი პანდემიასთან ბრძოლის კონტექსტში".

განცხადებაში საუბარია ივანიშვილის თათბირებზე საქართველოს მთავრობასთან და პროფილურ საბჭოებთან, რომლებიც, პარტიის მტკიცებით, სახელისუფლებო შტოებს კოორდინაციის და ეფექტურობის გაზრდის თვალსაზრისით" ეხმარებიან.

"ამ რეჟიმში მუშაობს ბიძინა ივანიშვილი და ასე მუშაობდა ყოველთვის, რაც პოლიტიკაში დაბრუნდა. უბრალოდ ახლა, შექმნილ ვითარებაში, გაცილებით მეტი მუშაობა უწევს და კიდევ უფრო ინტენსიურ კომუნიკაციაში იმყოფება გუნდთან; ამ ტიპის თათბირები და შეხვედრები პარტიაში ყოველდღიურად იმართება და ბიძინა ივანიშვილი, მუდმივ კონტაქტშია ანტიკრიზისულ საბჭოსთან და პოლიტიკური გუნდის ლიდერებთან.

თუმცა, როგორც მანამდე, დღესაც ბიძინა ივანიშვილი, ოპონენტებისგან და მათი ლიდერებისგან განსხვავებით, არა საკუთარი თავის წარმოჩენაზე, პიარზე და პოლიტიკური დივიდენდების მიღებაზე, არამედ საქმის კეთებაზე და მოსახლეობისთვის ხელშესახები შედეგის მიღებაზეა ორიენტირებული", — აღნიშნავენ პარტიაში.

მათივე თქმით, მუშაობის შედეგები სახეზეა და სწორედ საქართველოს ხელისუფლების წარმატება ანიჭებს ბიძინა ივანიშვილს ოპტიმიზმსა და "იმის ხალისს, რომ საკუთარ ვაჟთან ერთად ჩაწეროს სახალისო ვიდეო, წარსდგეს არაორდინალურ ამპლუაში და შეზღუდვებით დამძიმებულ მოსახლეობას გაუზიაროს ის ოპტიმიზმი, რომლის საფუძველიც ჩვენს ქვეყანას ნამდვილად აქვს".

ამასთან, პარტიაში აღნიშნავენ, რომ ნაციონალურ მოძრაობას, "ავტომატურად აღონებს და ხასიათს უფუჭებს ქვეყნის და ხალხის წარმატება".

პოლიტიკურმა პარტია ქართულმა ოცნებამ მათი ლიდერის, ბიძინა ივანიშვილის TikTok ვიდეოზე ვრცელი განმარტება გაავრცელა. ისინი ფიქრობენ, რომ "აბსოლუტურად უწყინარ გართობაზე" ოპონენტებმა "უკადრებელი იკადრეს" და "ღვარძლიანი" კრიტიკის ტალღა გაუშვეს. ასევე, ისინი ფიქრობენ, რომ განცხადებები "აბსურდული და სასაცილოა", თუმცა მათ მაინც პასუხობენ.

პანდემიის დროს მმართველი პარტიის ხელმძღვანელი TikTok-ის ვიდეოში გამოჩნდა.

მაშინ, როცა მთელი მსოფლიო მისალმების ახალ სტილს სწავლობს, რომ ხელის ჩამორთმევა აირიდოს, ივანიშვილები "საიდუმლო ხელის ჩამორთმევის" ვიდეოს გვიზიარებენ.

ამავე თემაზე: