ერთი წლის წინ 23 აპრილი, წიგნის საერთაშორისო დღე, წიგნის ჩუქების დღედ გამოცხადდა. იდეის ინიციატორები არიან: გიორგი კეკელიძე, ეროვნული ბიბლიოთეკა, მაღაზიათა ქსელი ბიბლუსი და ანაგრამა.

წელს, კორონავირუსთან დაკავშირებით შექმნილი ვითარების გამო, ეს დღე განსხვავებულად აღინიშნება. აქციაში ჩართვის თითოეულ მსურველს თავის ფეისბუკგვერდზე შეუძლია მონიშნოს მეგობარი, დადოს სასაჩუქრედ გამზადებული წიგნის ფოტო სლოგანით #აჩუქეწიგნი. წიგნი კი პანდემიის დასრულების შემდეგ გადაეცემა ადრესატს.

"ალბათ, გახსოვთ საყოველთაო გამოწვევა, რომელიც ერთი წლის წინ, 23 აპრილს, წიგნის საერთაშორისო დღეს, დავაწესეთ და ძალიან ბევრი ადამიანი ჩაერთო. ქვეყანაში არსებული მდგომარეობიდან გამომდინარე გთავაზობთ, ერთი მხრივ არ დავივიწყოთ ეს ინიციატივა, ნუ გავწყვეტთ ახალ ტრადიციას და ირიბი ფორმით შევახსენოთ ერთმანეთს ეს დღე. დღეს, საღამოს 18 საათზე, განვათავსებ პოსტს და იმედი მაქვს, ვიაქტიურებთ. ასევე, 23-ში, შეგიძლიათ, გამოაქვეყნოთ წიგნის გარეკანი, რომლის ჩუქებასაც მეგობრისთვის აპირებთ მას შემდეგ, რაც კორონა წავა. დანარჩენს ვიდეოდან შეიტყობთ", — აცხადებს გიორგი კეკელიძე.