მთელ მსოფლიოში ერთ-ერთი ყველაზე დიდი ტექნოლოგიური კომპანია თავის თანამშრომლებს ჯამში 14-კვირიან მშობლის დეკრეტულ ანაზღაურებად შვებულებას აძლევს, რათა კორონავირუსის პანდემიის გამო სკოლების დახურვის შემდეგ ოჯახებზე სათანადოდ ზრუნვა შეძლონ.

კომპანიამ გასულ თვეში დასაქმებულებს ორკვირიანი ანაზღაურებადი შვებულება მისცა, რათა აუცილებლობის შემთხვევაში სახლში დარჩენილი მოზარდის, მცირეწლოვანის ან სხვა განსაკუთრებული საჭიროების მქონე პირზე ზრუნვა შესძლებოდათ. თანამშრომლებს ასევე შესაძლებლობა ჰქონდათ დამატებით კიდევ ოთხი კვირა გამოეყენებინათ, ახლა ჯამში კი სულ 14 კვირამდე გაიზარდა მათი მშობლის დეკრეტული შვებულების ვადა.

როგორც კომპანიის წარმომადგენელი აცხადებს, დასაქმებულებს კონკრეტულ დღეებში დასვენებასთან ერთად სამუშაო საათების მათთვის სასურველ გრაფიკზე მორგებაც შეუძლიათ.

ეს გადაწყვეტილება Google-ის სრულ განაკვეთზე დასაქმებულ თანამშრომლებს ეხებათ, რომელთა რაოდენობაც 100 000-ზე მეტია.

აღსანიშნავია, რომ მსგავსი გადაწყვეტილება კიდევ ერთმა ტექ-გიგანტმა Microsoft-მაც მიიღო და თავის თანამშრომლებს უფლება მისცა, რომ 12-კვირიანი ანაზღაურებადი შვებულებით ესარგებლათ.

ბოლო მონაცემებით, კორონავირუსის გავრცელების გამო მთელ მსოფლიოში მოსწავლეების 91%-ის სწავლის ფორმატი შეიცვალა, რადგან სკოლები დაიხურა. შესაბამისად, დაახლოებით 1,6 მილიარდი ბავშვი სახლიდან დისტანციურ რეჟიმში აგრძელებს სწავლას, რაც დასაქმებულ მშობლებს კიდევ უფრო უძნელებს სამუშაოს ძველი დატვირთვით შესრულებას. ამიტომაც სხვადასხვა კომპანიები ცდილობენ, რომ დასაქმებულებს მაქსიმალურად შეუწყონ ხელი, რათა ოჯახზე ზრუნვასა და სამუშაოს შესრულებაში დრო თანაბრად გადაანაწილონ.