ამერიკის რესპუბლიკური პარტიის წამყვანი ხმა ეროვნული უსაფრთხოების საკითხებში ჯონ მაკკეინი აცხადებს, რომ მიუღებელია მისი თანაპარტიელი პრეზიდენტის ადმინისტრაციის ნებისმიერი მცდელობა, რუსეთთან ურთიერთობის დალაგების მიმართულებით. ინფორმაციას ABC ავრცელებს.

მისი განცხადებით, მოსკოვთან ურთიერთობის განახლება ამერიკას სირიელი ხალხის მასობრივ მკვლელობაში თანამონაწილეს გახდის, რომელსაც ვლადიმერ პუტინი და სირიის პრეზიდენტი ბაშარ ასადი ახორციელებენ.

"ეს ჩვენნაირი დიდებული ერისთვის მიუღებელია. როდესაც ამერიკა მართლა დიდებული იყო, ის ტირანიის ბრძოლის წინააღმდეგ იდგა. ჩვენ იქ დგომა უნდა განვაგრძოთ".

მაკკეინმა, რომელიც ამერიკის შეიარაღებული ძალების კომიტეტის თავმჯდომარეა, გააკრიტიკა პუტინი და მას კაგებეს ყოფილი აგენტი უწოდა, რომელმაც თავისი ქვეყანა ტირანად აქცია, მოკლა პოლიტიკური მოწინააღმდეგეები და საფრთხე შეუქმნა ამერიკასთან მოკავშირეობას.

ვლადიმერ პუტინსა და დონალდ ტრამპს შორის სატელეფონო საუბარი ორშაბათს შედგა, სადაც ამერიკისა და რუსეთს შორის სამომავლოდ ურთიერთობის გაუმჯობესება განიხილეს.

ტრამპის ადმინისტრაციის განცხადებით, ამერიკის ახალი პრეზიდენტი აპირებს მტკიცე და ძლიერი ურთიერთობა ჩამოაყალიბოს რუსეთთან.

დონალდ ტრამპი თავის წინასაარჩევნო კამპანიაში ხშირად გამოხატავდა სიმპათიას ვლადიმერ პუტინის მიმართ. "ვლადიმერ პუტინი უკეთესი ლიდერია, ვიდრე ბარაკ ობამა" - თქვა მან. ტრამპის თქმით, მან იცის, როგორ აღადგინოს ურთიერთობა რუსეთთან, რომელიც ბარაკ ობამას პრეზიდენტობისას გაუარესდა.

"ობამას ადმინისტრაციამ რუსეთთან ურთიერთობის დალაგება მას შემდეგ შეწყვიტა, რაც პუტინი უკრაინაში შეიჭრა და ახლო აღმოსავლეთში სამხედრო ინტერვენცია განახორციელა" - დასძინა მაკკეინმა.

ჯონ მაკკეინმა საპრეზიდენტო არჩევნებამდე რამდენიმე კვირით ადრე განაცხადა, რომ ტრამპს აღარ დაუჭერდა მხარს.