მწერალი ლაშა ბუღაძე სასულიერო პირების განცხადებებს ეხმაურება და ამბობს, რომ სუპერმარკეტში მისული ადამიანების სალარო აპარატსა და მოლარეს არ კოცნიან.

მისი თქმით მნიშვნელოვანია, რომ არსებული წესები ყველამ დაიცვას და კანონს დაემორჩილოს.

"სუპერმარკეტში ჩვენ არ ვკოცნით სალარო აპარატსა და მოლარეს. იქ როდესაც ერთი კოვზით იღებს საზიარო პურს, ან როდესაც კოცნიან ერთსა და იგივე ხატს და შუშას ეს არის პრობლემა, თორემ ერთმანეთს არ ვკოცნით ჩვენ ბანკის რიგში თუ ვდგავართ", — განაცხადა ლაშა ბუღაძემ TV პირველის ეთერში.

იმის საპასუხოდ, რომ ეკლესიაში მისული მრევლის თავყრილობა კორონავირუსის გავრცელების საფრთხეა, სასულიერო პირები არგუმენტად სუპერმარკეტში მისულ ადამიანების რიგს იშველეიბენ. მათი თქმით, ვირუსის გავრცელების რისკი ყველგანაა, მათ შორის სუპერმარკეტებშიც.

15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

ამის შესახებ ინფორმაცია საპატრიარქოს პრესსპიკერმა, ანდრია ჯაღმაიძემ და პრემიერ-მინისტრის პრესსპიკერმა, ირაკლი ჩიქოვანმა თანმიმდევრულად გააჟღერეს. ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

16 აპრილს ცნობილი გახდა, რომ საქართველოში კორონავირუსით კიდევ 30 ადამიანი დაინფიცირდა და მათი რაოდენობა ჯამში 336 გახდა. ბოლო მონაცემებით, საქართველოში კორონავირუსისგან გამოჯანმრთელებულია 74 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: