პირველი საუნივერსიტეტო კლინიკის დირექტორმა, ლევან რატიანმა მოსახლეობა გააფრთხილა, რომ თუ ასე გაგრძელდება "ღლიცინი", რასაც მისივე თქმით, ქვეყნის მოსახელობის უმეტესობა აკეთებს, ვერ აუვლენ ამდენს ქართველი ექიმები და არ ეყოფათ რესურსი:

"ამ ვირუსის შესახებ ბოლომდე არც მე ვიცი და არცერთმა წამყვანმა ინფექციონისტმა. ერთადერთი რაც ვიცით მხოლოდ და მხოლოდ ამ ვირუსის ბიოლოგიური თვისებების შესახებ, ეს არის ფიზიკური დისტანცია, რაღა დროში გაიწელოს ეს ყველაფერი, არ დავსნებოვდეთ და არ წამოგვივიდეს ის გართულებები, რაც მსოფლიოს სხვა ქვეყნებშია. ბატონ პაატას [იმნაძეს] დიდ პატივს ვცემ, ნამდვილად ასე იქნება, დადგება მომენტი, რომ ექიმი ქვეყანას არ ეყოლება. ჩვენც ადამიანები ვართ, ჩვენც გვაქვს რესურსი და შესაძლებლობა. ყველას ვთხოვ და მოვთხოვ, ეს იქნება ერი თუ ბერი, ფიზიკური დისტანცია დავიჭიროთ. არ მინდოდა მეთქვა, მაგრამ მე მყავს 3 შვილი და თვენახევარია ჩემი ოჯახის არცერთი წევრი არ მინახავს. განა არ მენატრება, იმაზე მეტად მენატრება, ვიდრე სხვებს, მაგრამ მეორე მომენტია, ეს ცხოვრება დაგვიდგა, უნდა დავცილდეთ ერთმანეთს რომ გადავრჩეთ.

ვერ წარმოუდგენია ადამიანებს რა ხდება ჩვენს რეანიმაციაში, როგორ იხრჩობიან ადამიანები, იმიტომ რომ ერთმანეთს არ გაუფრთხილდნენ. გამოძვრნენ ახალგაზრდები, მაგრამ ასაკოვანი ადამიანები მიჯაჭვული არიან. ამ ხრჩობის ყურება ძალიან ძნელია ჩვენთვის. ნუ გაგვაკეთებინებთ იმას, რომ ჩვენც დავიხოცოთ, ნუ გაგვიკეთებენ. ამ დრომდე ვიჭერდით, იმედია, დავიჭერთ თუ ყველანი სახლში დავსხდებით. სახლშიც რომ ვიქნებით, წყალი, ჩაი, ერთმანეთის პირისპირ არ უნდა დავლიოთ".

დღესვე, 16 აპრილს ბოჭორიშვილის კლინიკის სამეთვალყურეო საბჭოს თავმჯდომარემ, მაკა სოლოღაშვილმა მოსახლეობა გააფრთხილა, რომ თუკი რეკომენდაციებს არ დაიცავენ და სახლში არ დარჩებიან, ადამიანური რესურსი და მარაგები აღარ ეყოფათ. მან ჟურნალისტებთან განმარტა, რომთუ ამ ტემპით წავიდა ზრდა ეს აღჭურვილობა, ალბათ, 10 დღის განმავლობაში ეყოფა, თუ ზრდის ტემპით წავიდა, "არაპროგნოზირებადია".

16 აპრილს ცნობილი გახდა, რომ საქართველოში კორონავირუსით კიდევ 30 ადამიანი დაინფიცირდა და მათი რაოდენობა ჯამში 336 გახდა. ბოლო მონაცემებით, საქართველოში კორონავირუსისგან გამოჯანმრთელებულია 74 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: