დღეს აღიარებულ მწერლებს, ბესტსელერების ავტორებს და ლიტერატურულ ლეგენდებს – ზოგჯერ ძალიან ჩვეულებრივი, დამღლელი და არასახარბიელო საქმის კეთება უწევდათ. მიღებულმა გამოცდილებამ კი არამხოლოდ მათი არსებობა, არამედ ხშირად მათი შემოქმედების ფორმაც განსაზღვრა. აქ გიყვებით ხუთი ცნობილი ავტორის ისტორიას — როგორ ცხოვრობდნენ დიდების მოხვეჭამდე.

1. აგათა კრისტი – მედდა და აფთიაქარის ასისტენტი

ერთერთი ყველაზე გაყიდვადი ავტორი, აგათა კრისტი, პირველ მსოფლიო ომში მუშაობდა მედდად და შემდეგ აფთიაქარის ასისტენტად. სწორედ ამ პერიოდში შეისწავლა ქიმიური ნივთიერებები და შხამები – რაც მის დეტექტიურ მოთხრობებში გახდა მკვლელობის ერთ-ერთი ყველაზე გავრცელებული ხერხი. მისი სადებიუტო რომანი, სტაილზის საიდუმლო საქმე, პირდაპირ ეყრდნობა მის სამედიცინო გამოცდილებას.

2. ჯ.კ. როულინგი – მდივანი და ინგლისურის მასწავლებელი

ჰარი პოტერის დაბადებამდე, ჯოან როულინგი ორენოვანი მდივნის პოზიციაზე ამნესტი ინტერნეიშენალში მუშაობდა, შემდეგ კი პორტუგალიაში — ინგლისურის მასწავლებლად. სწორედ ამ პერიოდში დაიწყო ჰარი პოტერისა და ფილოსოფიური ქვის პირველ ვერსიაზე მუშაობა. მოგვიანებით, სოციალურად დაუცველი დედის სტატუსით, წიგნს კაფეებში წერდა, როცა მისი შვილს იქვე ეძინა.

3. ფრანც კაფკა – სადაზღვევო აგენტი და აზბესტის ქარხნის თანამფლობელი

ფრანც კაფკა, რომელმაც გვაჩუქა მეტამორფოზა, მუშაობდა პრაღის დასაქმებულთა დაზღვევის ინსტიტუტში და აზბესტის მცირე ქარხნის თანამფლობელი იყო. მისი ნაწარმოებები – ბიუროკრატიული სისტემების, შიშისა და გაუცხოების თემებით – ირეკლავს მის ყოველდღიურ ცხოვრებას სამსახურში.

4. ჯორჯ ორუელი – იმპერიის პოლიციელი და ჭურჭლის მრეცხავი

1984-ისა და ცხოველების ფერმის ავტორმა, ჯორჯ ორუელმა სამსახური დაიწყო ბირმაში, ბრიტანეთის იმპერიის პოლიციაში. კოლონიალიზმით იმედგაცრუებულმა, თანამდებობა რამდენიმე წელიწადში პროტესტის ნიშნად დატოვა და პარიზის და ლონდონის რესტორნებში ჭურჭლის მრეცხავობით და სხვა დროებითი სამუშაოებით ირჩენდა თავს. სწორედ ამ გამოცდილებებმა დააწერინა მისი პირველი ცნობილი ნაშრომი — პარიზისა და ლონდონის ფსკერზე

5. სტივენ კინგი – დამლაგებელი და მრეცხავი

სანამ კერი და მისი შემდგომი ბესტსელერები სტივენ კინგს წარმატებას მოუტანდნენ, ის დამლაგებლად მუშაობდა სკოლაში, ბენზინგასამართ სადგურსა და სამრეცხაოში. სწორედ ერთ-ერთი დღიური წმენდისას გაუჩნდა იდეა კერის გოგონათა გასახდელის სცენისთვის.

ეს ისტორიები გვახსენებს, რომ ლიტერატურული ბრწყინვალება ხშირად სრულიად ჩვეულებრივ ადგილებში იბადება. დაბალშემოსავლიანი სამსახურები ამ ავტორებს არამხოლოდ არსებობისთვის, არამედ შთაგონებისთვისაც გამოადგათ.