ნიკ ოფერმანი, რონ სვანსონის როლის შემსრულებელი NBC-ის სერიალში პარკები და რეკრეაცია, ცოტა ხნის წინ გამოეხმაურა ჰომოფობიურ ტვიტს, რომელმაც პრაიდის თვესთან დაკავშირებით, მისი პერსონაჟის აზრი გააყალბა.

2025 წლის 1 ივნისს, X-ის (ტვიტერის) მომხმარებელმა გამოაქვეყნა მონაკვეთი სერიალიდან, რომელშიც სვანსონი კომპიუტერს ნაგავში აგდებს, კომპიუტერის ნაცვლად კი ვიდეოში ლგბტქ+ დროშაა დამონტაჟებული. პოსტს თან ახლდა წარწერა: "მხოლოდ იმის თქმა მინდოდა, როგორ ვგრძნობ თავს 'პრაიდის' თვესთან დაკავშირებით".

ნიკ ოფერმანი მალევე გამოეხმაურა მისი პერსონაჟის ამ ინტერპრეტაციას და ტვიტის ავტორს შეახსენა, რომ სვანსონი სერიალის ფინალში ერთსქესიან ქორწილში იყო მეჯვარე. მან დაწერა:

რონი ერთნაირსქესიანთა ქორწილში მეჯვარე იყო, ბრიყვო. #HappyPride

ფოტო: X.com

რონ სვანსონი სერიალში პარკები და რეკრეაცია ლიბერტარიანელი პერსონაჟია, რომელსაც სძულს ბიუროკრატია და მიიჩნევს, რომ მთავრობა რაც შეიძლება ნაკლებად უნდა ჩაერიოს ადამიანის ცხოვრებაში. მიუხედავად გარეგნული სიმკაცრისა, იგი თბილი და ერთგული პერსონაჟია, განსაკუთრებით თანამშრომლებისა და მეგობრების მიმართ.

Parks and Recreations

Parks and Recreations

ფოტო: NBC

სერიალის ფინალურ ეპიზოდში — "ბოლო გასეირნება" — სვანსონი თავისი სტილისტის და თანამშრომლის მეჯვარეა, რაც ცხადად აჩვენებს მის მხარდაჭერას ლგბტქ+ თემის მიმართ.

ეს არ არის პირველი შემთხვევა, როცა ნიკ ოფერმანი ლგბტქ+ თემის მიმართ ურყევ მხარდაჭერას ასხივებს. გასულ წელს, როცა მან HBO-ს სერიალში The Last of Us-ში შესრულებული როლისთვის ჯილდო მიიღო, სამადლობელ სიტყვაში მწვავედ გააკრიტიკა სერიალის ეპიზოდის მიმართ ჰომოფობიური რეაქცია. The Last of Us-ის ამ ეპიზოდში ორი კაცის მტკივნეულად ლამაზი სიყვარულის ისტორიაა გადმოცემული.

The Last Of Us

The Last Of Us

ფოტო: HBO

ოფერმანმა სცენაზე თქვა: "ეს არ არის გეების ისტორია, ეს არის სიყვარულის ისტორია, რეგვენო!"