მროველ-ურბნელი მიტროპოლიტი იობი ამბობს, რომ კორონავირუსის შედეგად უფრო მოხუცები იღუპებიან. სასულიერო პირს მიაჩნია, რომ მოხუცები იღუპებიან, როცა ისინი ქვეყნიდან უკვე უნდა "გავიდნენ". ამის შესახენ მან დღეს, 15 აპრილს, ქადაგებისას განაცხადა.

ურბნელი მიტროპოლიტიც, სასულიერო პირების ნაწილის მსგავსად, კორონავირუსის საშიშროებაზე საუბრისას აბორტს ახსენებს. ეკლესიებში არ მისვლის შესახებ მოწოდება მრევლისთვის არც მას გაუკეთებია.

"ძალიან დიდი გამოწვევის წინაშეა მთელი სამყარო. საქართველო, მათ შორის. უფრო მეტი საშიშროება და მიზანმიმართული ქმედებაა საჭირო იმისთვის, რომ აბორტი არ ჩატარდეს. მსხვერპლი არის ამით. თუ ჩვენ დავაკვირდებით, კორონავირუსის შედეგად უფრო მოხუცები იღუპებიან, როცა ისინი უკვე უნდა გავიდნენ ამ ქვეყნიდან. დაუბადებელ ჩვილზე არავინ ფიქრობს. რატომ ასეთი საგანგებო მდგომარეობა არ იქმნება იმისთვის, რომ ჩასახული ბავშვები დაიბადონ", — განაცხადა მეუფე იობმა.

მსოფლიოში კორონავირუსით ინფიცირებულთა რაოდენობამ 2 მილიონს გადააჭარბა. ბოლო მონაცემებით, კორონავირუსით ინფიცირებულია 2 000 984 ადამიანი, გარდაცვლილია 128 071, ხოლო გამოჯანმრთელებულია 500 996 ადამიანი.

ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად 11 მარტს გამოაცხადა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ: