დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საპარლამენტო უმრავლესობის წევრი დავით მათიკაშვილი აცხადებს, რომ დღეს სამშობლოს სიყვარული და პატრიოტული მოვალეობა კორონავირუსის პრევენციისთვის საჭირო რეკომენდაციების შესრულებაში გამოიხატება. მან მოუწოდა მორწმუნეებს, ყველა კონფესიას, რომ მიუხედავად "ძალიან მნიშვნელოვანი დღესასწაულებისა" გაითვალისწინონ რეკომენდაციები.

"ამით ჩვენ დავიცავთ ჩვენს საზოგადოებას, ჩვენს ოჯახებს, მოქალაქეებს იმისგან, რომ ვირუსი კიდევ უფრო მეტად გავრცელდეს. დღეს არ არის დაყოვნების დრო, დღეს არის ბრძოლის დრო", — განაცხადა მან.

სხვა რელიგიური კონფესიებისგან განსხვავებით, მართლმადიდებელი ეკლესიის საპატიარქო უარს ამბობს საგანგებო მდგომარეობის წესების დაცვაზე და სამ კაცზე მეტის შეკრების აკრძალვის მიუხედავად, წირვა-ლოცვებს ისევ ათეულობით ადამიანი ესწრება. საპატრაირქოში აცხადებენ, რომ წესებს იცავენ და ამაში დისტანცირებულად დგომას და ხატების დეზინფექციას გულისხმობენ, თუმცა ერთი კოვზით ზიარება ისევ სრულდება და კომენდანტის საათის მიუხედავად სააღდგომო ლიტურგიაც ღამით დაიგეგმა.

ჯანდაცვის სფეროს წარმომადგენლებმა და მთავრობამ არაერთხელ მოუწოდეს მოქალაქეებს, რომ დარჩნენ სახლში და წირვას ტელევიზორში უყურონ, თუმცა მკაცრი განცხადებები იმაზე, რომ მრევლი დაჯარიმდებოდა, მთავრობაში არ გაუკეთებიათ.

ამ დროის მონაცემებით, საქართველოში კორონავირუსის 266 დადასტურებული შემთხვევაა, მათ შორის 67 გამოჯანმრთელდა, 3 კი გარდაიცვალა. კარანტინის რეჟიმში 4872 ადამიანი იმყოფება, სტაციონარში მეთვალყურეობის ქვეშ — 453.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: