ზუგდიდისა და ცაიშის ეპარქიის მიტროპოლიტი, მეუფე გერასიმე კორონავირუსზე სასულიერო პირების ტესტირებას "არ მიესალმება". ამის შესახებ მან ჟურნალისტებს განუცხადა.

მისი აზრით, მიუხედავად ეკლესიებში ხალხმრავლობისა და საერთო კოვზით ზიარებისა, რისკჯგუფად სასულიერო პირები არ უნდა ითვლებოდნენ.

"ვინ თვლის, რომ ჩვენ რისკჯგუფის წევრები ვართ? ასეთი რაოდენობა არის სუპერმარკეტებში, აფთიაქებში... თუ ასეა რისკჯგუფია ყველა, ვისაც ხალხთან შეხება აქვს. შევთანხმდებით და ერთობლივ გადაწყვეტილებას გავაჟღერებთ. მე, როგორც ერთ-ერთი მიტროპოლიტი , არ მივესალმები", — განაცხადა მეუფე გერასიმემ.

მთავრობის გადაწყვეტილებით, საყოველთაო კარანტინის პირობებში, სამზე მეტი პირის თავშეყრა იკრძალება, გარდა სასურსათო მაღაზიებისა და აფთიაქებისა. მიუხედავად ამისა, ეკლესიებსა და ტაძრრებში მსახურებები გრძელდება და მრევლი სოციალური დისტანციის დაცვით წირვებს ჩვეულ რეჟიმში ესწრება.

ჯანდაცვის სამინისტრომ, დაავადებათა კონტროლის ცენტრმა და სამედიცინო სფეროს ექსპერტებმა Covid-19-ის ტესტირების ალგორითმი შეიმუშავეს, რომელიც განსაზღვრავს, ვინ და როგორ დაიტესტება. ალგორითმში მოხვდნენ სასულიერო პირებიც. ამ თემაზე გუშინ პრემიერმა, გიორგი გახარიამ განაცხადა:

"ეს უკავშირდება ყველაფერს და პირველ რიგში, რისკების შეფასებას ეპიდემიოლოგების მხრიდან. საერთოდ, ამ პროტოკოლის შეცვლა დაკავშირებულია რისკების შეფასებასთან და რა თქმა უნდა, ეპიდემიის განვითარებასთან, ახალ ეტაპზე გადასვლასთან ქვეყანაში".

ბოლო მონაცემებით, საქართველოში კორონავირუსით ინფიცირების 234 შემთხვევაა დადასტურებული. აქედან გარდაცვლილია 3 ადამიანი, გამოჯანმრთელებულია 54.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: