პრემიერ-მინისტრის პრესსპიკერის, ირაკლი ჩიქოვანის თქმით, საქართველოში საგანგებო მდგომარეობის გახანგრძლივება ვირუსის გავრცელებაზე იქნება დამოკიდებული. 8 აპრილის ბრიფინგზე მან ჟურნალისტებს განუმარტა, რომ მთავრობა გადაწყვეტილებას მიიღებს ექიმების რეკომენდაციით, ასევე, გათვლებისა და მოლოდინების გათვალისწინებით:

"აპრილის ბოლოს და შუა რიცხვებში ვიმოქმედებთ იმ ვითარებიდან გამომდინარე, რა ვითარებაც იქნება ჩვენს ქვეყანაში. საუბარი იმაზე, რომ დღეს კონკრეტული გადაწყვეტილებაა მიღებული, სწორი არ იქნება და კიდევ ერთხელ დაეყრნობა იმ რეალობას, რაც იქნება ვირუსის გავრცელების თვალსაზრისით".

8 აპრილს საქართველოში კორონავირუსით ინფიცირების 12 ახალი შემთხვევა დაფიქსირდა და ჯამში ინფიცირებულთა რაოდენობა 208-მდე გაიზარდა. დადასტურებულ შემთხვევებს შორის გამოჯანმრთელებულია 46 ადამიანი. ინფიცირებულებს შორის კი გარდაცვლილია 3 პირი. კარანტინის რეჟიმში 4 674 პირი რჩება, ხოლო, სტაციონარში მეთვალყურეობის ქვეშ 362 პაციენტია.

ინფექციური საავადმყოფოს დირექტორის, მარინა ეზუგბაიას თქმით, 24 საათის განმავლობაში დადასტურებული ახალი შემთხვევებიდან 5 თბილისშია, 5 ბათუმში, 2 კი ქუთაისში.

მარინა ეზუგბაიას თქმით, ორი პაციენტს ვირუსი ცენტრალურ ინფექციურ საავადმყოფოში დაუდასტურდათ. ისინი 70 წელს ზემოთ პაციენტები არიან და ეროვნული ბანკის კლასტერს წარმოადგენენ.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: