ლეგენდარულმა იაპონელმა რეჟისორმა, სცენარისტმა და მანგის მხატვარმა ჰაიაო მიაძაკიმ, რომელმაც რამდენიმე წლის წინ კინოდან წასვლის შესახებ განცხადება გააკეთა, ამჯერად საკუთარ გულშემატკივრებს სიურპრიზი გაუკეთა და მისი, როგორც თავად ამბობს, უკანასკნელი ანიმე დააანონსა.

ანიმეს 75 წლის ოსტატმა იაპონიის საზოგადოებრივ მაუწყებელზე, სპეციალურად მასზე შექმნილ გადაცემაში - "ჰაიაო მიაძაკი - კაცი რომელსაც ჯერ არ დაუსრულებია" საკუთარ სამომავლო გეგმებზე ისაუბრა.

მიაძაკიმ თქვა, რომ ამჟამად მოკლემეტრაჟიან ანიმე"მუხლუხო ბოროზე" მუშაობს, რომელიც ტოკიოში სტუდია გიბლის მუზეუმის შესახებ იქნება, თუმცა აღნიშნა, რომ გეგმაში სრულმეტრაჟიანი ანიმეს შექმნაც აქვს.

მიაძაკის მრავალი ანიმე-ფილმი და მანგა ეკუთვნის, რომლებიც დიდი წარმატებით სარგებლობდა იაპონიასა და აღმოსავლეთ აზიაში. თუმცა დასავლეთში ის ანიმაციური წრეების გარეთ თითქმის უცნობი იყო 1999 წლამდე, მანამ სანამ მირამაქსმა მისი ფილმი "პრინცესა მონონოკე" არ გამოუშვა. მიაძაკის ფილმი "Spirited Away" კი იაპონიის ისტორიაში ყველაზე შემოსავლიანი ფილმი გახდა.