დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

კორონავირუსით ინფიცირებული სპორტსმენი, გიორგი ღვინჯილია ბოდიშს უხდის ყველას, ვინც მის გამო კარანტინში გადაიყვანეს. TV პირველის მიერ გავრცელებულ ვიდეომიმართვაში ის ჰყვება, რომ არ ჰქონდა არანაირი სიმპტომი მაშინ, როდესაც სამეგრელოში ხალხს ხვდებოდა:

"ვიცი, დამნაშავე ვარ და ჩემს დანაშაულს არ აქვს გამართლება, მაგრამ მე ეს შეგნებულად არ გამიკეთებია. არანაირი სიმპტომები არ მქონდა, არც სიცხე, არც ხველა და არც ყელის ტკივილი. ვიყავი სრულიად ჯანმრთელი, თავს მშვენივრად ვგრძნობდი და 28 მარტს საქმეზე წავედი ზუგდიდში. მოვინახულე მეგობარი, ოჯახში შევედი, ხელის ჩამორთმევა არ ყოფილა, უბრალოდ 1 საათს გავჩერდი და წავედი სოფელ ლიაში. იქაც ოჯახში ვიყავი, 1 ღამე გავატარე, შემდეგ წავედი წალენჯიხის ერთ-ერთ სოფელში, ბებიაჩემის საფლავზე. იქაც კონტაქტი მქონდა ერთ ოჯახთან, დისტანციურად, ხელის ჩამორთმევის გარეშე".

სპორტსმენი, ასევე, უარყოფს იმასაც, რომ "მთელი სამეგრელო მოიარა" და ამბობს, რომ მაქსიმუმ 16 პირთან ჰქონდა შეხება. იგი ჰყვება, რომ მისი და მისივე კონტაქტების პირადი ინფორმაცია გასაჯაროვდა და "ხალხმა ისინი ანათემას გადასცა".

"ის, რომ ჩემზე ლაპარაკობენ, თითქოს რუსეთის მოქალაქე ვარ, ახალი ჩამოსული ვარ და მოვიარე სამეგრელო, ესაა ცრუ ინფორმაცია. ისიც, რომ მე აფხაზეთიდან გამოვედი სამეგრელოში, სიცრუეა. ისიც რომ მე ვიყავი ჩხოროწყუში დაბადების დღეზე, სიცრუეა. კიდევ გამივრცელეს ჭორი, რომ ეკლესიაში ვიყავი წირვაზე. კიდევ ის, რომ მოვიარე სამეგრელო და მქონდა 150 კაცთან კონტაქტი, ესეც სრული სიცრუეა. მე კონტაქტი მქონდა მაქსიმუმ 16 ადამიანთან, აქედან, 4 ადამიანთან მჭიდრო კონტაქტი, აქედან ერთთან სახლში ვიყავი, ერთი ბოთლიდან და ერთი ჭიქიდან ვსვამდით. თბილისში ჩამოსვლის შემდეგ ისინი კარანტინში მოექცნენ. მათგან ოთხი პირს ჰქონდა ახლო კონტაქტი, არცერთს არ დაუდასტურდა ვირუსი, ასევე, კარანტინში მყოფებს არ აქვთ სიმპტომები".

6 აპრილის მონაცემებით, საქართველოში კორონავირუსით ინფიცირების 188 შემთხვევაა დაფიქსირებული. მათგან ორი პაციენტი გარდაიცვალა, 36 კი უკვე გამოჯანმრთელდა. ამ დრომდე კარანტინის რეჟიმში რჩება 5 056 ადამიანი, სტაციონარში მეთვალყურეობის ქვეშ — 386.

კორონავირუსი დაუდასტურდა საჩხერის მერის ცოლს, რომელიც საჩხერის კლინიკის ექიმია. მერი ბენიამინ ფალავანდიშვილი აცხადებს, რომ ინფორმაციის მიღების შემდეგ, თვითიზოლაციაში იმყოფება. ბოლო 2 კვირის განმავლობაში მას არაერთი შეხება ჰქონდა სხვადასხვა პირთან, თუმცა როგორც მუნიციპალიტეტის გავრცელებულ ფოტოებში ჩანს, ის პირბადით და ხელთათმანებით მოძრაობდა.

ჯერ კიდევ აქტუალურ საკითხად რჩება ეკლესიებში წირვა-ლოცვის ჩატარებისას მრევლის დასწრება. როგორც საპატრიარქო აცხადებს, ისინი იცავენ ყველა რეკომენდაციას და ღვთისმსახურების დროს მრევლს მოუწოდებენ, დისტანცია დაიცვან. საპატრიარქოს საზოგადოებასთან ურთიერთობის დეპარტამენტის ხელმძღვანელი, ანდრია ჯაღმაიძე ამბობს, რომ არ მიუღიათ გადაწყვეტილება, თუ რა იქნება აღდგომის დღესასწაულზე, რადგან სიტუაციის განმუხტვას ელოდებიან. მისივე თქმით, კომენდანტის საათის დროს მორწმუნე სახლში უნდა იყოს.

კორონავირუსის გავრცელების პრევენციისთვის საქართველოში 21 მარტს საგანგებო რეჟიმი გამოცხადდა და დამატებითი შეზღუდვები დაწესდა. აღნიშნული ზომები 31 მარტის შემდეგ გამკაცრდა, როდესაც პრემიერ-მინისტრმა გიორგი გახარიამ "ფაქტობრივი კარანტინი" გამოაცხადა. ამოქმედდა ე.წ. კომენდანტის საათი და სამზე მეტი ადამიანის შეკრება აიკრძალა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: